أول حاجة العجين.. نحط المكونات الجافة مع بعض و علبة الزبادي و نبتدي واحدة واحدة نضيف الماء الدافية و نعجن لحد م العجين يلم معانا و ميلزقش اوي بعدين نحط الزيت و نعجن تاني لحد م العجين يشرب الزيت و ميلزقش خالص و بعدين نلمه و نغطيه بكيس أو استرتش و نسيبه ف حرارة الغرفة لحد م يخمر حوالي ساعة كده..
(ولو عندكوا عجان يبقى اوفر)😂

بالنسبة للحشو.. هنحط اللحمة و البصل المبشور و الطماطم المبشورة بردو و الفلفل و الثوم و البقدونس مع بعض و البهارات و نقلب كل ده مع بعضه كويس و نسيبه بقى على جمب الاطعمه تدخل ف بعضها..

نرجع للعجين بعد م خمر هنعمله كور (قرص) زي م بتقوله عليها يعني مش هتفرق 😂 هتكون واحدة كبيرة تحت و واحدة صغيرة عشان فوق و ممكن نعمله كله كبير و نقفله على بعضه.. المهم بعد م كورناهم نغطيهم و نسيبهم بردو ربع ساعة كده يخمروا شوية كمان..

بعد الربع ساعة لو هنعمل على الرخامة نحط خيط زيت و نفرد العجين و نوزع اللحمة عليه كله و الأطراف عشان متكونش فاضية و نفرد الطبقة الثانية و نحطها فوقيها و هنقفله بايدينا نجيب طرف العجينة ال تحت على الطبقة ال فوق زي الصورة و نضغط عليه عشان ميتفتحش و هكذا بقيت العجين هنفرد و نحط طبقة اللحمة و بعدين نفرد العجينة الثانية و نحطها فوقيها و نقفل بايدينا..

بالنسبة للوجه هنخرم الرغيف بالشوكة و هنرش شوية حبة البركة و سمسم و بعدين نسيح سمنة أو زبدة على النار و بالفرشة السيلكون ندهن وجه الرغيف.. هننقله م على الرخامة لصينية يكون حرفها خفيف (زي بتاعت البيتزا) عشان ندخلها الفرن و كده بيبقى اسهل اني انقله من تحت لفوق