तिळ मंद आचेवर परतून भाजावे. सुकं खोबरं किसून घेऊन मग ते पण मंद आचेवर परतून खरपूस भाजून घ्यावे.

शेंगदाणे खरपूस भाजून मग जाडसर वाटून घ्यावे. गुळ बारीक चिरून घ्यावा.

जाड बुडाच्या पातेल्यात दोन टेबलस्पून तूप घालावे. तुपामुळे तिळाचे लाडू छान चकचकीत दिसतात. तूपावर बारीक चिरलेला गुळ घालून तो वितळून पातळ करून घ्यावा. मग त्यात भाजलेले तीळ, भाजलेलं सुकं खोबरं, वेलची पूड आणि फुटाणे डाळं घालावे.

मग भाजलेल्या शेंगदाण्याचे कूट घालून हे सगळे पदार्थ वितळलेल्या गुळामधे घालून मग गॅस बंद करून तिळगुळाचे मिश्रण चांगले मिक्स करावे.

तिळगुळाचे मिश्रण गरम असताना लगेचच लाडू वळावेत कारण मिश्रण गार झालं तर तिळगुळ लाडू वळायला कठीण होते. हाताला अगदी थोडंसं थेंबभर पाणी लावून मग लाडू वळले तर हात भाजत नाहीत. आणि तिळगुळ लाडू वळताना लाडवाचे पातेले एका गरम पाण्याच्या पातेल्यावर ठेवून मग लाडू वळावेत म्हणजे शेवटचा लाडू वळेपर्यंत लाडवाचे मिश्रण घट्ट होत नाही. पहिले तिळगुळाचे लाडू बनवून देवाला नैवेद्य अर्पण करावा.