نبدا بسم الله ونجيب حفنة نحط فيها 250غ زبدة و2صفار بيض وجبة بيضة كاملة وم ك فانيلا وم ك كاكاو بني وكاس سكر ناعم ونخلط مليح ثم نضيف كاس نشاء ونبدا نضيف فالفرينة وم ص خميرة الحلوى ونلم حتى نتحصل على عجينة صابلي نغطيها ونخليها ترتاح

نجيب كيس بلاستيك ونحب عليه العجينة تاعي ونجيب طابع دائري ونطبع العجينة حتى نكمل كامل العجينة

نحضر الان الميرانغ والكاستال تاعي نجيب ريسبسيون نحط فيه 4بياض بيض ونحط رشة ملح ونبدا نطلع بالباتور حتى يبدا يبياض ونبدا نضيف فالسكر تدريجيا ونواصل الخلط حتى نتحصل على ميرانغ ثقيل ثم نضيف كمية من الكاكاو محمص ومرحي ونخلطو فالميرانغ مليح

بعد ماكملت الكاستال نجيب سيني الفرن ونحط فيها حبات الصابلي ونجيب لابوش نعمر الكاستال تاعي فيها ونحط في كل حبة كما فالصورة حتى نكمل كامل الكمية ونشعل الفرن يسخن وندخل الصابلي يطيب من تحت فقط ثم نخرجو ونخليه يبرد

بعد ذلك نحضر كريمة الزبدة ونحطها في لابوش ونحطها فالحواف تاع حبة الصابلي ونحط فالوسط م ك كابريس ذايبة ونغلق يحبة صابلي اخرى ونخليه يلصق مليحة

بعد مالصق الصابلي نذوب 500غ شكولا بالحليب ونحط فيه الزيت ونذوبها مليح ونغلف حبات الصابلي ونخليها تجف مليح

بعد ما شاح الصابلي ونجيب ترونسفار مكتوب فيه عيد مبارك ونحط فيه شكولا تذوب ونحطها تجمد ثم نحيها ونحط نقطة من الشكولا ونلصق الترنسفار فوق حبة الصابلي

فالاخير نحط حبات الصابلي في كيسات جاء هايل وبرستيج