نبدا بسم الله ونجيب وريدات من شفلور نغسلهم مليح ونحطها في كسرونة نضيف عليها كمية ماء وملح وم ص كركم ونحطو عالنار حتى يطيب مليح ونجيب نصف صدر دجاج كبير الحجم

نرجع نقطع نصف صدر الدجاج على 2نصف نقطعو مربعات لتحضير صلصة الدجاج والنصف الاخر نرحيه فالاشوار ونقعطلو بقدونس

نجيب مقلاة نحط فيها م ك زيت ونحطها عالنار ونحط عليه حبة صغيرة بصل مرحية و2فص ثوم مرحي نقلي مليح ونضيف قطع الدجاج

نحط عليهم ملح وكركم و بابريكا حلوة وحارة وم ك طماطم مصبرة وفلفل اسود وراس الحانوت ونخلط مليح ونقلي جيدا ثم نضيف صلصلة طماطم ونقلي جيدا

نضيف كاس ماء ونخلي الدجاج يطيب مليح ثم نجيب حبة بطاطا نغسلها ونقطعها مربعات

نقلي البطاطا في زيت غزير ونرجع الشفلور بعد ماطاب نصفيه ونحطو في صحن

نرجع للشفلور نقطعو صغير ونخلطو مع الدجاج المرحي ونضيف ملح وفلفل اسود وبابريكا وفلفل اسود

نخلط الكل مليح ونضيف 2م.ك شابلير ونعجن الكل مليح

نعجن مليح ونشكل عجيجات او كرات ونحطهم في فرينة نرمدهم فيها حتى نكمل كامل الدجاج ونجيب مقلاة نحط فيها زيت نخليها تسخن ونحط العجيجات يطيبو على نار هادئة حتى يطيب الدجاج

نقلب من كلا الجهتين حتى يتقلا العجيجات ونحطهم فوق ورق ماص يتشرب الزيت ثم نجيب مول زجاجي يدخل الفرن نحط فيه البطاطا المقلية

نرجع نحط العجيجات فوق البطاطا ثم نحط كمية الدجاج والصلصة المقلية على كامل السطح ونحط كريمة الجبن من فوق ونحط جبن مبشور على كامل السطح ونغطي بورق الطهي المول ونشعل الفرن يسخن وندخل المول من تحت حتى تندمج ثم نشعل الفرن من فوق حتى يتحمر ويذوب الجبن تماما

فالاخير نخرج الڨراتان من الفرن ونقدمو وهو ساخن مع كسرة خميرة (مطلوع)