تقطعي صدر دجاج قطع صغيرة تفرغي عليه علبة يأورت طبيعي ترابي ثوم تضيفي توابل مذكورة ملح وشوية زيت وتخلطيهم وتخليهم اذا كانو عشاء هذي طريقة ديرها من لعشية باش مكونات تتجانس مع بعضها في كل ما طولت كل ما تدي بنة مليحة

تقشري باطاطا و تقطعي و تقليها و بعد ما تقليها قطريها من زيت وتخليها على جنب

تنقي سلاطة وتغسليها مليح بماء وخل وتخليها تقطر من ماء

من جيهة اخرى تجيبي مقلاة ديره يحمى و ضيفيلو شوية زيت وملقعة طماطم مصبرة وبعد ضيفي دجاج لي خلطتيه وتخليه حتى يطيب (يستوي) ومع تحريك مستمر وكي يطيب (يستوي) ربي عليها فرماج (جبنة) ونحي من فوق نار

بعد تحلي خبز نتاعك ديري فيه فرماج (جبنة) وتضيفي سلاطة بعد ما تكوني سمقتيها بزيت وخل وملح وبعد ضيفي بطاطا وبعد ديري خلطة دجاج من فوق مايونيز

ان شاء الله يعجبكم وبصحة وراحة وبالتوفيق للجميع😘❤