بكون ناقعه الدجاج بالخل والملح والليمون وزيت الزيتون من نص ساعة إلى ساعة بغسله وبنظفه منيح وبصفطوا بطنجرة الضغط وبحط عليه ملعقة بهارات مندي خشنة ومعلقة صغيرة بهارات مندي ناعمة و ٣حبات لومي وورق غار ورشة ملح وبس تغلى الماء عليه بضغط الطنجرة لمدة ١٢ دقيقة

بجهز حشوة الرز اللي هي ببرش الجزرتين والبندورتين والبصل والثوم وبقطع الفليفلة الملونة قطع صغيرة

بحط زيت نباتي وبحوس البصل والثوم وبس بتذبلوا بضيف البندورة والجزر والفليفلة ومعلقة رب البندورة وعلى نار خفيفه ليستوو تقريبًا ١٠ دقائق

بعمل خلطة تحمير الدجاج اللي بهوس فصين ثوم ومعلقة رب البندورة ومعلقة طحينية ومعلقة لبن وكاتشب وبهارات تحمير الدجاج وبخلطهم مع بعض وبدهن الدجاج وبفوتو عالشواي

بكون ناقعه الرز بغسله وبصفيه بحطه بالطنجرة وبحط عليه شوية ملح ومرق الدجاج فقط وبس يغلى وتنشف الماء عليه بخفف تحته على الاخر وبفتح حفرة بنص الرز وبدفن حشوة الرز وبسكر الرز عليه وبعمل ٤ حفر صغيرة بحط ملونات طعام برتقالي واصفر او احمر وبغطي وجه الرز بكيس نايلون ليستوي على راحته

بعدين بشيل الدجاج وبصير بالشوكة اقلب الرز مشان الملونات تتداخل ببعض وحشوة الرز تتوزع على كل الرز اللي بالطنجرة

وبسكب الرز وبصفط الدجاج على وجهه وبزينوا بفليفلة ملونه وليمون ولوز

يقدم جنبه طبعًا صلصة الدقوس الحارة