الحواوشي مفيهوش افتكاسات الحواوشي فيه تكات اول تكة ان كمية البصل تساوي كمية اللحمة يعني لو كيلو لحمة تحطي قدامهم كيلو بصل ومتخافيش البصل هيدوب لانه مفروم ناعم ومش بيبان نهائي بس بيدي طعم حلو اوي

كمان الحواوشي بهاراته قليلة يعني مافيهوش كسبرة وكمون وجوزة الطيب وسن العفريت وحاجات غريبة مفيش اكتر من القرفة ودي تعتمديها في اي لحمة مفرومة او غير مفرومة والبهارات هي اصلا مليانة كل حاجة

اهم حاجة الراجل مش بيسوي الحواوشي في طاسة هو بيسويه علي شواية مسطحة او في الفرن يبقي تجيبي جريلة زهر من اي حداد هي مش غالية بس بجد الطعم بيفرق وخصوصا في البرجر والحواوشي والكبدة الاسكندراني

دلوقتي اخلطي المقادير كلها سوا وافضلي اعجني فيها زي كانك بتعملي عجينة عيش لحد ماتحسي ان كله دخل في بعضه وبقت ماسكة في بعضها

هتجيبي العيش البلدي الجميل بتاعنا وتختاري الي وشه ابيض مش واخد تسوية وتفتحيه وتفردي طبقة رقيقة من اللحمة ماتخافيش بعد التسوية اللحمة هتنفش والرغيف هيملي العين

دلوقتي من غير ولا سمن ولا زيت حطي الرغيف علي الشواية في الاول نار عالية لحد ماتلاقي الرغيف نشف وقتها خففي النار لمتوسطة وسيبيه يستوي علي مهله النتيجة هتلاقي الرغيف ماسك نفسه مهما اللحمة نزلت سوايل او دهون عكس لو دهنتي الجريل هتلاقي الرغيف طري وفرفت منك واتهري

علي كل وش بياخد حوالي من ٥الي٧ دقايق ومش اكتر من ١٠ لكل ناحية والا اللحمة هتتحرق وتمرر

دلوقتي قدميه مع المخلل والسلطة البلدي والطحينة وبالف هنا وشفا للي ياكل