बटाटे उकडून घ्यावे. पनीर मिक्सरनी बारीक करून घ्यावं. बटाटे थंड झाल्यावर मिक्सरनी बारीक केलेल्या पनीरमधील थोडेसे पनीर, बटाटा, आरारूट पावडर, मैदा व चवीनुसार मीठ घालून पीठाचा गोळा मळतो तसेच भिजवून तेलाचा हात लावून ठेवावे. ही झाली एग्जच्या वरच्या कोटींगची तयारी.....आरारूट पावडर व एक चमचा मैदा बाईंडिगसाठी वापरले आहेत.

आता आपण आतील पिवळा योक बनवून घेऊ. यासाठी छान बारीक केलेल्या पनीरमध्ये थोडी हळद व चवीनुसार मीठ घालून याचे हाताने गोल गोळे करून घेऊ....

तयार करून घेतलेल्या पिवळ्या गोल योकना वरतून कोटींग द्यायचे आहे. यासाठी मळून घेतलेल्या पिठाची पारी करून त्यात पनीरचा पिवळा गोळा ठेऊन हलक्या हाताने बंद करत याला अंड्यांसारखा आकार द्यावा.....

कढईत तेल गरम करून यात तयार करून घेतलेली व्हेज अंडी मैद्यामधे घोळून मंद आचेवर तळून घ्या.....

आता आपण ग्रेव्ही करून घेऊ. यासाठी टोमॅटो आणि कांदे मिक्सर प्युरी करून घ्यावी. नंतर कढईत तेल गरम करून त्यात जीरे आणि 2-3 हिरव्या मिरच्या टाकून कांद्याची प्युरी परतून घ्या, नंतर आले लसुण पेस्ट व टोमॅटो प्युरी साईडनी तेल सुटेपर्यंत परतून घ्या...

परतून घेतलेल्या प्युरीमधे बेसन, गरम मसाला, धने पावडर, मिरपूड, हळद, तिखट,भरडलेली बडीशोप सगळे जिन्नस टाकून नीट भाजून घ्या. कारण यात बेसन घातले आहे. नंतर यात पाणी घालून चवीनुसार मीठ घालावे, ऊकळी आली की यात तळून घेतलेली अंडी घालून 5 मिनीट शिजू द्यावे.

5 मिनीटांनंतर छान शिजल्यावर झणझणीत व चटपटीत व्हेज अंडाकरी पराठ्या सोबत सर्व्ह करावी....