कैऱ्या राजापुरी जातीच्या घ्याव्यात. त्या कडक,कमी आंबट आणि खोबऱ्यासारख्या असतात.या कैऱ्या 5-6तास पाण्यात बुडवून ठेवाव्यात. स्वच्छ धुवून चीक वगैरे काढून कोरड्या कराव्यात.सोलाण्याने साले काढावीत व जाड किसाच्या किसणीने किसाव्यात.या चार कैऱ्यांचा एक किलो कीस पडला.

सर्व कीस मोठ्या स्टीलच्या पातेल्यात घालावा. आता यात मीठ व साखर घालावे.साखरही मोजून घ्यावी व सगळीकडून हलवून घ्यावे.साखर,मीठ योग्य प्रमाणात घालावे.

स्टीलच्या पातेल्याला वरुन पातळ पांढरा मऊ असा पंचा घट्ट बांधून पातेले दररोज उन्हात ठेवावे. असे सलग चार दिवस ठेवावे.संध्याकाळी घरात आणून पंचा सोडवून डावाने सर्व मिश्रण हलवावे.असे दररोज करावे.कडक उन मिळेल अशा ठिकाणी दररोज 7-8तास पातेले ठेवावे.

चार दिवसानंतर कैरी साखरेचा घट्ट असा गोळा होतो.तसंच साखरेचा छान तार येणारा पाक होतो.आता यात तिखट आणि जीरेपूड घालावे.

पुन्हा एक दिवस 3-4तास छुंदा उन्हात ठेवावा व घट्ट झाकणाच्या बरणीत भरुन ठेवावा.ठेपले,पराठे,पोळी,धिरडी या बरोबर छान लागतो.तसंच फक्त जीरेपूड व तिखट असल्याने उपवासालाही चालतो.उन्हात ठेवलेला असल्याने वर्षभर छान टिकतो.