بطنجرة كبيرة بنحط الفخاد وبنحطلن مي اكتر من غمرن بشي 5 سم.بس تطلعي الزفرة على السطح بنشيلا بملعقة وبنستمر لحد ما تخلص الزفرة وتغلي المي.

بس تخلص الزفرة وتغلي المي بنحط الفلفل الأسود، جوزة الطيب المطحونة، السبع بهارات، الملح، ورق الغار، كبش القرنفل، عيدان القرفة وحبات الهال وبنغطي الطنجرة وبنضعف النار عالفخاد وبنتركن ليستوو.

بمقلة تيفال بنحط ملعقتين كبار زيت نباتي وبنقلب البصلة لحد ما تبلش تشقر ، بنضفلا اللحمة والملح والفلفل الاسود وبنحركا وبنتركا لتستوي.بس تخلص بنطفي تحتا وبنتركا ع جنب.

ب مقلة تانية بنحط شي 4 ملاعق زيت نباتي وبنحط البازيلا بعد ما نكون صفيناها من المي وبنحطلا رشة ملح ورشة فلفل اسود وبنحركا من وقت للتاني لحد ما يصير شكلا متل ما واضح بالصورة. وبس تخلص بنطفي النار وبنخليا ع جنب.

بس ينسلق الفروج ويستوي ويخلص بنصفيه من ميتو(طبعا مع الاحتفاظ ب مية سلق الفروج لأنوبدنا نطبخ الرز فيا) وبنحطو بصينية فرن وبنحطو بفرن محمى مسبقا لحد ما تاخد الفخاد لون أشقر خفيف.

بنغسل الرز منيح وبنصفيه من المي وبطنجرة تانية بنحط 6 ملاعق كبار زيت نباتي وبنقلب فين الرز شي دقيقتين.

بعد الدقيقتين بنضيف مية سلق الفروج وبنعير لكل كاسة رز كاستين مي. بنحط مكعبات الماجي وبنحرك وبنتأكد انو المكعبات دابو بالمي تماما حتى ما يكبتلو مع الرز. بس تغلي المي بنخفف النار وبنغطي الطنجرة وبترك الرز ليستوي

بس يخلص الرز بنجيب طبق السكب وبنحط طبقة رز فوقا طبقة لحمة بعدا طبقة بازيلا وبالاخر بنحط الفخاد وبنزين باللوز والكاجو. طبعا ممكن نقدم جنب هالطبق لبن مع صحن خضرة وألف صحة وهنا 😙😙😙