انا طيبت طبقتين منفصلين تاع جينواز بديت ب ٣ حبات بيضيكونو بدرجة حرارة الغرفة فصلت الابيض على الاصفر و درت مع بياض البيض 45 غرام سكر +رشة ملح +فاني مغرف قهوة كبيرة معمرة مليح و نطلعه مدة 6دقيقة حتان يولي بشكل رغوي نقلب الماعون ميطيحش نغرف بلي الجينواز ناجح ١٠٠% والصفار نديرله 45 غرام تاع سكر وفاني ونطلعه حتى يتكاثف الخليط ويميل لونه للبياض

نزيدله 3مغارف ماء دافي و نخلط بدها ندخل الصفار في البياض مليح ونزيدلهم الفرينة 90غرام ومعاها 4 غرامات خميرة الحلويات منخولين مرتين ندخلهم في الخليط

نطلع كأس شانتيه مع كأس ناقص شوي درت خليط بين قهوة براس ثقيلة مع الحليب تكون المكونات كل باردة جداً ونقسم كل طبقة على 2 و نبدى نسقي في كل طبقة بسيرو نكون حضرته من قبل لازم يكون بارد وزدتله اضافة ذوبت فيه نيسكافي و ندير الكريمة حتى نكمل 4 طبقات

نلبسها بكريمة شانتيه و نخليها تبات ليلة كاملة في الثلاجة

نبدة نحضر في الشوكولاتة للتزيين ندير 100 غرام شوكولاته نذوبهم على حمام مائي و كي تذوب نزيدلها علبة ياغورت بذوق الشوكولاتة نخلطها معاها ملح و 3 مغارف حليب دافي

نخليها تبرد شوي تولي دافية نبدى ندير خطوط بالمغرف كما هو موضح و بعدها نطليها في الوجه