૫૦૦ મિલી દૂધને એક પેનમાં એક ઊભરો આવે એટલું ગરમ કરો. એક બાઉલમાં વિનેગર અને ૧ ટેબલ ચમચી પાણી મિક્સ કરો. દૂધ ૨ મિનિટ ઠંડું પડે એટલે થોડું થોડું વિનેગર ઉમેરી હલાવો. પનીર છૂટું પડે ત્યાં સુધી કરો. આ પનીર ને કોટન કપડાં માં પાણી નિતારી ૨-૩ વાર ચોખ્ખા પાણીથી ધોઇ લો. કોટન દબાવી વધારાનું પાણી નીકાળી લો. આ પનીર ને ગળણીની અંદર કોટનમાં થોડીવાર માટે મૂકી રાખો જેથી વધારાનું પાણી નીકળી જાય.

હવે બાકીના એક લીટર દૂધમાંથી ૨ ચમચી દૂધ લઇ તેમાં કેસર ઓગાળો. બાકીના દૂધને કઢાઇમાં લઇ ગરમ મૂકો. ઊભરો આવે એટલે કેસરવાળું દૂધ અને ૧/૨ ટીસ્પૂન ઇલાયચી પાઉડર ઉમેરી ધીમા ગેસ પર ઊકળવા દો.

હવે એક પ્લેટમાં પનીરને લઇ ૩-૪ મિનિટ માટે હથેળીથી મસળો. તેમાં મેંદો, દળેલી ખાંડ, ૧/૨ ટીસ્પૂન ઇલાયચી પાઉડર નાખી ફરી ૨ મિનિટ માટે મસળો. તે પછી સોડા નાખી ૨ મિનિટ માટે મસળો. હવે આ મુલાયમ પનીર ના ૮ સરખા ભાગ કરી નાના પેંડા વાળી લો. વચ્ચે સહેજ ખાડો કરો.

એક કઢાઇમાં ઘી કે તેલ ગરમ મૂકો. અને ધીમા તાપે આ બધા પનીરના વડા તળી લો. ગોલ્ડન બ્રાઉન થાય ત્યાં સુધી ધીમા તાપે તળવા.

બીજી બાજુ દૂધ જે ધીમા તાપે ઊકળે છે તેમાં ખાંડ ઉમેરો. હલાવીને બધા વડા ઉમેરી ઊકળવા દો. લગભગ ૩૦ મિનિટ મિડિયમ તાપે ઊકળવા દો. વડીઓ દૂધ પીને ફૂલશે અને દૂધ ત્રીજા ભાગનું થઇ રબડી થઇ જશે.

રસબળી બની ને તૈયાર છે. તેને ફ્રીઝમાં ઠંડી કરીને પીરસો.