सर्वप्रथम चित्रात दाखविल्याप्रमाणे सगळे साहित्य घ्यावे. आता टॉमेटो, कांदे, मिरची व आले यांचे एकदम बारीक मिश्रण करून घ्यावे. (हे वाटताना अजिबात पाणी घालू नये). आणि सोललेला दीड लसूण पाकळ्या व्यवस्थित ठेचून घ्याव्यात.

आता ओली हळद नीट सोलून किसून घ्यावी. नंतर gas वर कढईमध्ये तूप घ्यावे. (सगळे तूप घालू नये, थोडे ठेवावे. आपण ते नंतर घालणार आहोत).
तूप गरम झाल्यावर त्यात जिरे व सगळा खडा मसाला घालून छान चुरचुरू द्यावा.
आता त्यात किसून घेतलेली हळद घालून घ्यावी. हळद त्या तुपात व्यवस्थित शिजवून घ्यायची आहे.

५-७ मिनिटे चांगली परतवून घ्यावी. आता त्यात ठेचलेला लसूण घालून परत ७-८ मिनिटे हळद व लसूण चांगले तूप सुटेपर्यंत परतवून घ्यावे. छानपैकी परतवून घेतलेल्या हळदीत तयार केलेले टॉमेटो, कांदे, मिरची व आले यांचे तयार मिश्रण घालून परत ५ मिनिटे मिक्स करून घ्यावे. आता त्यात २ अक्खे लसूण घालून २ मिनिटे ढवळून शिजवून घ्यावे. (हा घातलेला अक्खा लसूण शिजल्यावर अतिशय अप्रतिम लागतो. त्यात ओल्या हळदीची चव जि उतरते त्याला तोडच नाही). आता त्यात आधी शिल्लक ठेवलेले तूप घालावे.

आता त्यात दही घालून व्यवस्थित एकत्रित करावे व २ मिनिटे चांगले शिजू द्यावे.(दही घातल्यावर भाजी सतत ढवळत राहावी जेणेकरून दही फाटणार नाही). नंतर त्यात ब्लांच केलेले मटार घालावेत. आणि एक उकळी काढून घ्यावी. ओल्या हळदीची भाजी तय्यार!!!

पारंपारिक पद्धतीनुसार ही भाजी बाजरीच्या भाकरीबरोबर खाल्ली जाते. फक्त ही भाजी बनवताना काही पथ्ये लक्षात ठेवावीत.
हळदीची भाजी करताना त्यात अजिबात पाणी घालायचे नाही. ही भाजी पूर्णतः तुपातच शिजवायची असते, कारण हळद ही अतिशय उष्ण प्रकृतीची असल्याने तिची उष्णता नियंत्रित करणे आवश्यक असते. याच कारणासाठी आपण या भाजीत दहीदेखील वापरतो.
ही भाजी खूप निगुतीने करावी लागते आणि पूर्ण वेळ हि भाजी घाटत राहावी, नाहीतर हळद खाली लागू शकते.