சேனைக் கிழங்கை சுத்தம் செய்து சதுரமாக வெட்டிக் கொள்ளவும். கழுவி ஒரு குக்கரில் சேர்த்து, உப்பு மஞ்சள் தூள் புளி தேவையான அளவு தண்ணீர் சேர்க்கவும். இதனை மூடி ஒரு விசில் வரை வேக விடவும்.

வெந்தபின் தண்ணீரை வடித்துக்கொள்ளவும். புளியை எடுத்து விடவும்.

வாணலியில் பொறிக்க தேவையான அளவு எண்ணெய் சேர்த்து, சேனை கிழங்கு நன்கு ஆறியபின் பொரித்து எடுக்கவும்.

பட்டை, கிராம்பு, இஞ்சி, பூண்டு, வரமிளகாய் இவற்றை மிக்ஸியில் கொரகொரப்பாக அரைக்கவும். அதன் பின் ஒரு துண்டு தேங்காயை நறுக்கி கொரகொரப்பாக அரைத்துக் கொள்ளவும்.

இறுதியில் சின்ன வெங்காயத்தை சேர்த்து கொரகொரப்பாக அரைத்துக் கொள்ளவும். அதே வாணலியில் பொரித்த எண்ணெயை எடுத்து விட்டு தேங்காய் எண்ணெய் சேர்த்து கருவேப்பிலை போட்டு தாளிக்கவும். பிறகு அரைத்த மசாலாவை சேர்த்து வதக்கவும்.

மசாலா பச்சை வாடை போன பின் வேக வைத்த சேனைக்கிழங்கை சேர்க்கவும். கூடவே தேவையான அளவு உப்பு சேர்த்து நன்கு ரோஸ்ட் செய்யவும்.

வேக வைத்து வடித்த தண்ணீரில் இருந்து சிறிது தண்ணீர் சேர்த்து மூடி போட்டு சேனை கிழங்கு வேகும் வரை சமைக்கவும். தண்ணீர் நன்கு வற்றியபின் ரோஸ்ட் போல தயார் செய்து பரிமாறவும். அலங்கரிக்க மல்லி இலைகளை சேர்த்துக்கொள்ளலாம்.