नारळी भात बनवताना बासमती तांदूळ जुने असतील तर ते धुवून पाणी काढून १५ मिनिटे ठेवावे. जर कोलम किंवा इतर तांदूळ वापरले तर लगेचच धुवून वापरावे. काजूचे तुकडे करुन घ्यावे. लवंग काढून ठेवावी. नारळ खवणून त्याचं पांढरं खोबरं घ्यावे. गुळ बारीक चिरून घ्यावा.

कुकर मधे २ टेबलस्पून तूप घालून त्यात फोडणी साठी लवंग आणि काजूचे तुकडे घालून ब्राऊन होईपर्यंत परतावे. मग त्यात धुतलेले तांदूळ घालून अलगद परतावे, म्हणजे तांदूळ मोडणार नाही.

तांदूळ परतल्यानंतर त्यात बारीक चिरलेला गुळ आणि खवणलेलं ओलं पांढरं खोबरं, थोडी साखर घालून, वेलची पावडर आणि जायफळ पावडर घालून मिक्स करुन त्यात तांदळाच्या अडीच पटीने पाणी घालून उकळी आल्यानंतर मगच कुकरचे झाकण लावून दोन शिट्या काढून भात शिजवून घ्यावा. कुकर उघडल्यानंतर अलगदपणे भात मिक्स करावा. खूप चविष्ट असा नारळी भात तयार होतो.