સૌ પ્રથમ ચોખા, તુવેરની દાળ, મગ ની મોગર દાળ ને અલગ અલગ સાફ કરી તેને એક બાઉલ માં મિક્સ કરી બે થી ત્રણ સાફ પાણીથી ધોઈ લો. હવે એમાં બીજું ચોક્ખું 1 કપ પાણી ઉમેરી ઢાંકણ ઢાંકી ને 30 મિનિટ માટે સાઈડ પર મૂકી રાખો. તમે 30 મિનિટ પછી જોસો તો ચોખા અને દાળ ફૂલી ને પાણી શોષી લીધું છે.

હવે એક પ્રેશર કુકરમાં તેલ ગરમ કરી તેમાં રાઈ અને જીરું ઉમેરી રાઈ અને જીરું કકડે એટલે એમાં લવિંગ, બાદિયા ના ફૂલ, તજ નો ટુકડો, તમાલપત્ર, સૂકા લાલ મરચા, મીઠા લીમડાના પાન અને સીંગદાણા ઉમેરો.

હવે આમાં હળદર પાવડર, લાલ મરચું પાવડર ઉમેરી મિક્સ કરી સાંતળો. ત્યાર બાદ આમાં સમારેલા શાકભાજી - રીંગણ, બટાકા, ગાજર, કોબીજ, લીલા વટાણા અને લીલા મરચાં ની પેસ્ટ ઉમેરી મિકસ કરી લો. (આમાં શાકભાજી તમે ગમે તે લઈ સકો છો)

હવે આમાં પાણીમાંથી નિતારી દાળ અને ચોખા ઉમેરી સાથે નમક અને શંભાર મસાલો ઉમેરી બરાબર મિક્સ કરી લો. હવે આમાં ત્રણ ઘણું પાણી ઉમેરી બરાબર મિક્સ કરી મીડિયમ ગેસ ની આંચ પર કૂકર નું ઢાંકણ ઢાંકી 2 વ્હિસલ વગાડી 90% ખીચડી કૂક કરી લો.

હવે એક બાજુ ખીચડી કૂક થાય છે ત્યાં સુધી કઢી નું બેટર તૈયાર કરી લો. તેની માટે ખલ માં લીલા મરચાં ના કટકા, મીઠા લીમડાના પાન અને આદુ ઉમેરી અધકચરા વાટીને ચટણી બનાવી લો.

ત્યાર બાદ એક બાઉલ માં છાસ ઉમેરી તેમાં 1 કપ પાણી ઉમેરી તેમાં ચણા નો લોટ અને તૈયાર કરેલી ચટણી અને નમક ઉમેરી બરાબર મિક્સ કરી લો.

હવે ખીચડી ના કૂકર નું ઢાંકણ ખોલી ને ખીચડી ને હલાવી લો. હવે આમાં સમારેલા ટામેટા, લીંબુ નો રસ અને ખાંડ ઉમેરી બરાબર મિક્સ કરી લો. ત્યાર બાદ આમાં 1 કપ પાણી ઉમેરી મિક્સ કરી હાઈ ગેસ ની આંચ પર 1 વ્હીસ્લ વગાડી કૂક કરી લો અને કૂકર ને આપમેળે ઠંડું થવા દો.

હવે આપણે કઢી નો વઘાર કરીશું. એની માટે એક પેન માં તેલ કે ઘી ગરમ કરી તેમાં જીરું ઉમેરી કકડાવી તેમાં સૂકા આખા લાલ મરચાં, તમાલપત્ર, લવિંગ, મીઠા લીમડાના પાન ઉમેરી સાંતળી લો.

હવે આમાં કઢી નું બેટર ઉમેરી તરત જ ઢાંકણ ઢાંકી દેવું જેથી વઘાર કઢી માં બેસી જાય. હવે આમાં હળદર પાવડર અને તજ પાવડર ઉમેરી મિક્સ કરી લો.

ત્યાર બાદ આમાં ખાંડ ઉમેરી સતત હલાવતા જઈ કઢી ને ઊકાળતા જવું. હવે કઢી તૈયાર થઈ ગઈ છે તો આમાં લીલી કોથમીર ના પાન ઉમેરી મિકસ કરી લો.

હવે આપણી ખીચડી પણ કૂક થઈ ગઈ છે. તો એમાં લીલી કોથમીર ના પાન ઉમેરી બરાબર મિક્સ કરી લો.

હવે આપણી સ્વામિનારાયણ મંદિર ના સમૈયા માં પ્રસાદ રૂપે મળતી સાત્વિક કઢી ખીચડી તૈયાર છે સર્વ કરવા માટે. આ કઢી ખીચડી ને તમારી ઈચ્છા મુજબ ગાર્નિશ કરી પ્લેટિંગ કરો.