प्रथम कढईत १ मोठा चमचा तेल गरम करुन त्यात चौकोनी तुकडे करुन चिरलेला कांदा आणि पनीरचे तुकडे गुलाबीसर परतून घ्यावेत.

कांदा आणि पनीरचे तुकडे परतून झाल्यावर एका प्लेटमधे काढून घ्यावे.

आता त्याच कढईत २ टेबलस्पून तेल घालून चांगले गरम करावे आणि त्यात जीरे व हिरवी मिरची घालून फोडणी करावी, फोडणी तडतडली कि त्यात बारीक चिरलेला कांदा आणि आलं-लसूण-हिरवी मिरची पेस्ट घालून चांगले एकजीव परतून घ्यावे आणि कांदा मऊ होईपर्यंत शिजवावे.

आता वरील मिश्रणात, बारीक चिरलेला टमाटर, धणे पावडर, हळद, लाल तिखट, काश्मिरी लाल मिरची पावडर, शाही गरम मसाला हे सर्व घालून, तेल सुटेपर्यंत शिजवावे.

नंतर वरील मिश्रणात, ३ टेबलस्पून दही घालून सतत ३-४ मिनीटे ढवळावे जेणेकरुन दही फाटणार नाही.

एक उकळी आल्यावर, बाजूला परतून ठेवलेले कांदा व पनीरचे तुकडे घालून चांगले एकजीव मिक्स करावे. नंतर त्यात चवीनुसार मीठ आणि लिंबाचा रस घालून एक उकळी घ्यावी.

गॅस बंद करुन, तयार भाजीवर कोथिंबीर गार्निश करुन डिश सर्व्ह करावी.
गरम गरम पनीर-दो-प्याजा़.... चपाती, नान, फुलके, पराठे किंवा तंदुरी रोटी या सोबत छान लागतो.