ओलं खोबरं खवणून घ्यावं आणि गुळ किसून घेऊन मिक्स करुन थोडावेळ ठेवावे म्हणजे छान एकजीव होऊन खोबर्याला पाणी सुटते. तिळ आणि खसखस भाजून घ्यावे.

गुळ खोबर्याचे मिश्रण पॅनमधे घालून परतावे मग त्यात भाजलेली खसखस, तिळ, वेलची पूड आणि चारोळी घालून मिक्स करावे. पॅनच्या कडेने गुळ खोबरे सुकू लागल्यावर सारण तयार झाले असे समजावे.

पॅनमधे अडीच वाट्या पाणी घालून त्यात चिमूटभर मीठ, एक टीस्पून लोणी आणि २ टेबलस्पून भाजलेले तीळ घालावे. मग पाणी उकळल्यावर त्यात तांदळाचे पीठ घालून चांगले मिक्स करुन मग झाकण ठेवून गॅस बंद करावा. दहा मिनिटात छान वाफ येऊन पीठ शिजते. मग तेल किंवा तूप हाताला लावून गरम असतानाच पीठ चांगले मळून घ्यावे.

मोदकाच्या साच्याला आतील बाजूस तूप लावून साचा बंद करुन त्यात मोदकाचे पीठ भरुन सर्व बाजूंनी सारखे पसरावे. नंतर त्यात गुळ खोबरे सारण भरून त्यावर मोदकचे पीठ लावून मोदक बंद करावा. आणि साचा अलगद उघडून त्यातील मोदक बाहेर काढून त्यावर परत भाजलेले तीळ लावावे. मग मोदक पात्रात दहा मिनिटे वाफवून मोदक उकडून घ्यावे. मोदकाचा साचा न वापरता हाताने पण सुंदर मोदक बनवतात.

गरमागरम वाफाळलेल्या तिळाच्या मोदकांवर तुप घालून नैवेद्य देवाला अर्पण करून मग ते प्रसादाचे मोदक तूप घालून खावे. भाजलेले तीळ घातल्यामुळे मोदक खाताना छान खमंग आणि क्रंची लागतात.