بسم الله في الأول ندير الزيت في طنجرة ونزيدلو الدجاج ونقليهم مليح من بعد نزيد البصل والثوم مرحيين والتوابل ونحركهم حتى يتحمصو مليح من بعد نزيد ملعقة الفرينة (هي لي تعقدلي المرق) ونحرك وفي الاخير نمرقها ونخليها تطبخ.

نجيب للكفتة وندوزنها بالبصل والثوم والشابلير والمعدنوس والتوابل وحبة البيض ونخلطهم مليح من بعد نجيب كمية من الكفتة نفتحها ونديرحبة البيض المسلوقة بعد ما قشرتها في الوسط ونغلق عليها مليح ونكون الطبقة خشينة باه متنفتحش معاك نزيد الحبة الثانية بنفس الطريقة والكفتة لي بقات درتها في مول السيليكون ودرتو في الفرن حتى يطيبو.

نسخن الزيت ونرمد حبات الكفتة لي بالبيض بالفرينة ونقليهم حتى ياخدو تحميرة وبعد ما يطيب (يستوي) الدجاج نزيدلو البولات تاع الكفتة تغلي عشرة دقائق ونزيدلها الزيتون والمعدنوس ونطفي عليها،بعد ما طيب الكفتة لي في الفرن ننزعها من ليمول ونديرها في المرق باه تتشرب ونقدمها بالهناء والشفاء والتزيين يبقى اختياري.