أولا نبدا بالعجينة : في إناء نحط كاس حليب والخميرة والسكر والزيت وخميرة الحلويات والملح ونبدى نلم بالفرينة حتى نتحصل على عجينة طرية نغطيها ونخليها تخمر.

ثانيا الحشو: نحط في مقلاة البصل مقطع شرائح في شوية زيت نخليها تتقلى شوية ونزيد عليها الفلفل الخضر والفلفل الأحمر نخلط مليح ونزيد حبة طماطم مقطعة مربعات صغيرة نخليها تتقلى 05 د.

نضيف التوابل (الملح، الكاري، الفلفل الأسود، الكركم، ثوم بودرة) نخلط مليح ونضيف نص كاس ماء غالي محلول فيه الطماطم المصبرة ونخلط مليح نحرك ونخليها طيب حتى تنشف وقبل ما نطفي عليها ضفت نصف صدر الدجاج مشوي كان عندي من قبل ونخليها تبرد مليح باش نستعملها

في هاد الأثناء تكون العجينة خمرت، نقسمها على إثنين نحل الكرية الأولى نحطها فوق صينية، نزيد الحشو يكون بارد ومن الأحسن نصفيه من السوائل

نسرح الحشو مليح، نضرب حبة بيض وندهن ساير داير ونضيف الجبن حسب المتوفر (استعملت الطري وشيدار)، نغلق بالكرية الثانية نكون حليتها مليح، ونغلقها جيدا

نذير ثقب في العجينة (نبيكيها)، ندهن الوجه بالبيض المخفوق مع القليل من الحليب، وزينت بشرائح الفلفل الأخضر والأحمر والزيتون الأسود ورشة خفيفة من جنجلان والقليل من الجبن المبشور.

ندخلها للفرن المسخن مسبقا، كي طيب من تحت نشعل عليها من فوق، نخرجها ونمسحها مسحة خفيفة بزيت الزيتون تجي طرية وبنينة

وتقدم بألف صحة وهنا.