نبدأ على بركة الله، أولا بعجينة المسمن نحط في إناء الفرينة والملح والسكر والزيت ندخلهــم مليـح ونبـدا نلـم بالمـاء دافيء حتى نتحصل على عجينة متماسكة وفي نفـس الوقـت رطبــة ندلكهـــا شويـة ونديرها في كيس بلاستيكــي نخليهــا ترتــاح مـدة 2 سوايــع ، نفـس العجينة استعملتهــا مـن قبـل فـي الفطائـر المقرمشة على شكل كوكياجة يمكنكم 👈🏻تفقد الوصفة من خـلال هــذا الرابــط👇🏻.

في هاذ الوقت نوجد الحشو، في إناء حطيت صدر الدجاج مقطع مكعبات صغيرة ضفت عليه التوابل المذكورة أعلاه والموطارد، الياغورت طبيعي والمعدنوس مقطع رقيق نخلط كل المكونات حتى ينساجمو من الأحسن نغطيها وندخلها للثلاجة مدة ساعة أنا مكانش عندي الوقت طيبتها مباشرة، في مقلاة نحط القليل من الزيت تسخن نضيف البصلة ونخليها تتقلى وتذبال مليح نضيف الفلفل مقطع رقيق (حلو وحار) ونخليه حتى هو يتقلى مليح على نار متوسطة من بعد نضيف قطع الدجاج المتبل ونخليه يطيب على نار هادئة.
ملاحظة مهمة: ✔يمكن ديرو الحشو اللي تحبوه.

كي ارتاحت العجينة شكلت كريات كيما تاع المسمن ودهنتهم بالزيت وغطيتهم ببلاستيك غذائي باش ما يديروش القشرة من فوق. نوجد في غرفية صغيرة الزبدة مع الفلفلة حمرة نخلطها مليح تعطينا لون جميل، نحل كرية مليح مليح كيما نديرو المسمن أو المحاجب.

نبدأ بالشكل الأول: دهنت السطح بالمزيج الزبدة والفلفة حمرة ودخلت العجينة من أربعة جهات للوسط كما هو هوضح في الصور (نتحصلو على أربعة ورقات أو بتلات ههه) نرجع بتلّة للداخل.
ملاحظة مهمة: ✔دهن السطح بالزبدة يعطينا ذوق وقرمشة رائعة.

نحط الحشو في الوسط ومن فوق القليل من الجبن الطري نغلق عليه بالتناوب كما هو موضح في الصور.

أما الشكل الثاني نفتح الكرية جيدا وندهنها بمزيج الزبدة والفلفلة حمرة ونطويها كيما المسمن نسرحها شوية ونحط الحشو في الوسط وفوقو القليل من الجبن الطري.

نغلق عليها كيما الظرف نلم الأطراف إلى الداخل، الحبة اللي نكملها نحطها في صينية الفرن من الأحسن تكون مفرشة بورق الطهي.

ندهن الوجه بصفار البيض مخلط مع الفلفلة حمرة ونزين بالزيتون الأسود، وندردر القليل من الجنجلان وندخل الصينية للفرن المسخن مسبقا على درجة حرارة متوسطة إلى هادئة باش يطيبو على مهلهم ويتورقو. كي يطيبو نحطهم فوق مشبك باش يبردو.
ملاحظة مهمة: ✔اللي يحب الحار في مكان الفلفة حمرة يدير لهريسة أنا مكانتش عندي.

وقدّمتهم بألف صحة وهنا 👌🏻😋👌🏻 يجيو مقرمشين وبزاف بنان.