بسم الله اللهم صل وسلم وبارك علي سيدنا محمد اولا نغسل حبات البرتقال جيدا ونشفهم من بعد نبشر غي القشرة البرتقالية نحاول اني ما نوصلش للقشر الأبيض ونحتفظ بالمبشور لغرض اخر في كسرونة تكون كبيرة نضع كمية من الماء ونضع فيها حبات البرتقال بدون ما نقشرهم باش يطيبو وتروح المرورية منهم لما يستوو ننزعهم من الكسرونة لي طابو فيها ونشفهم جيدا ونتركهم يبردو

لما يبردو نقطع كل حبة إلى أربعة وننزع اللب الأبيض لي وسط الابراج ونتركهم جانبا في كسرونة نضع السكر مع الماء وشريحة ليمون ونتركهم على نار يغلو

لما تغلي الشاربات عشرة دقايق نضع أبراج البرتقال ونترك الابراج يتعسلو لما وننزع الرغوة لي تطلع من فوق لما يستوي المعجون تاعنا نضع مغرف ص فانيلا ونطفي الغاز نتركه يبرد ويقدم

انا اول مرة نجربو بهذي الطريقة صراحة جا اكثر من رائع هايل تع الصح نشكر الأخت Cuisine_marya على الوصفة لي اكثر من رائعة الله يجازيك كل خير حبيبتي
شهيتكم في الجنة خياتي الله يدومها نعمة علينا وعليكم