نبدأ باسم الله، في إناء نحط الفرينة والخميرة والسكر والملح والزعيترة، في الأول فرغت عليها اللبن ثم نبدا نلمها بالماء دافيء نخليها شوية تلصق في اليد.
ملاحظة: ✔الكاس اللي عبرت بيه سعته 200 ملل.
نصيحة: ✨يعتبر اللبن محسن للعجين يمكن تعويضه بملعقة كبيرة حليب بودرة.

في الأخير نضيف عليها زيت الزيتون وندخلها في لعجينة مليح حتى تولي ملساء وفي نفس الوقت رطبة وتلصق شوية في اليد، نغطيها ببابي فيلم (بلاستيك غذائي) ومن فوق سربيتة ونخليها تخمر للمرة الأولى مدة 10 دقائق.

نديقازي لعجينة (نهبطلها لخمور) ونعاود نغطيها ونخليها تخمر للمرة الثانية.

في هاذ الوقت نوجد صلصة الطماطم كنت 👈🏻حطيت الوصفة من قبل بالتفصيل يمكن تفقدها من خلال هذا الرابط👇🏻 ونقلّي النقانق، ونقلي شرائح الفلفل الأخضر (نقليها نص طياب برك) ونخليها تبرد.

نوجد كل المكونات، ونهبط لخمور للعجينة ونقطعها إلى 3 كريات متساوية بمساعدة السميد رطب مخلط مع شوية فرينة نخليها ترتاح 5 د ونبدأ نخدم.

نحل الكرية الأولى بالحلال نحاول نديرها دائرية. في هاذ الوقت نشعل على الريشو (الطابونة) ونحط فوقها الطاجين اللي نطيبو فيه المسمن ولمحاجب معندوش الحافة (مقلاة حديدية ثقيلة) على نار مرتفعة نخليها تسخن مليح ونشعل في نفس الوقت الفرن على أعلى درجة باش حتى هو يسخن مليح، نحطها فوق ورق الزبدة باش تسهل عليا حملها، ندهنها بصلصة الطماطم نحط كمية في الوسط ونمشيها كما هو موضح في الفيديو.

نرشها رشة خفيفة من الجبن المبشور ثم نضيف شرائح الفلفل الأخضر المقلي والنقانق (قطعتهم دوائر رقيقة).

نسحبها فوق صينية ونديها مباشرة للطاجين، نغطي عليها ونخليها طيب من تحت على نار متوسطة، كي طيب من تحت نحط الجبن المبشور ونزيد الزيتون الأسود.
ملاحظة مهمة: ✔كي نحط البيتزا فوق الطاجين نقص على النار باش ما تتحرقش وطيب على خاطرها ومرة على مرة ندويها بمساعدة ورق الزبدة.

نعاود نسحبها فوق ظهر الصينية وندخلها للفرن المسخن مسبقا نطفي عليه من تحت ونشعل من فوق ونحطها في الرف الوسط ما تديش كامل الوقت في هاد المرحلة. كي طيب ونخرجها ندهنها دهنة خفيفة من زيت الزيتون (تعطيها لمعة شابة وتزيدلها في البنة).

نخدم الكرية الثانية والثالثة بنفس الطريقة، نسحبها فوق صينية ونديها مباشرة للطاجين نغطي عليها ونخليها طيب من تحت على نار متوسطة، كي طيب نحط الزيتون الأسود ونزيد الجبن المبشور، نعاود نسحبها فوق ظهر الصينية وندخلها للفرن المسخن مسبقا يكون شاعل غي من فوق ونحطها في الرف الوسط.

طيب تم تم وتتحمر كي طيب ونخرجها ندهنها بزيت الزيتون (مرحلة إختيارية) هي تزيدلها في المذاق.

تجي مجعبة وخفيفة وبزاف بزاف بنينة، كنت 👈🏻حطيت من قبل وصفة مماثلة لهاذ الوصفة تاع بيتزا بثلاثة أذواق يمكن تفقد الطريقة بالتفصيل من خلال هذا الرابط👇🏻

وقدّمتهــا بألـف صحــة وهنـــا 😋💖😋