نبدأ باسم الله، نغسل الطعام جيدا بالماء بارد (هذا الطعام مفتول باليد) نميل القصعة ونخليه ينشف مليح مليح من الماء، كي ينشف نحتتو بين يدي ونزيد 2 ملاعق كبار زيت ندخل هاد الزيت مليح، نعمر الكسكاس ونديرو يفور التفويرة الأولى.

كي يفور نقلبو في القصعة نحلو ونرشو بالماء بالتدريج ونضيف الملح نخلطو مليح ونخليه يشرب، هاد العملية نقوم بيها 3 مرات.

كي نفور التفويرة الثانية نوجد الروا في كاسرونة ندير فيها كمية من الماء والملح ونحطها فوق النار تغلي كي تغلي نرمي فيها البطاطا واللفت ونخليها طيب نص طياب من بعد نضيف عليها قطع من الكابوية الحمرا ونخليها طيب و تنقص من الماء.
ملاحظة مهمة: ✔تقدرو ديرو الخضرة في نفس القدرة اللي تفورو فيها تجي بنينة كثر.
✔قطّعت الخضر قطع عشوائية مكانش عندي الوقت كنت معجولة.

وفي هاذ الوقت نكون فورت التفويرة الثالثة نحلها بين يدي ونبردها شوية نضيف دهان الحر (دهان لعرب) وإذا مكانش حاضر ندير سمن المرجان ندهنو مليح ونبردو.

كي طيب وتوجد نضيف الحليب نكون حليت فيه حليب بودرة باش يجي عاقد نخليه يغلي ونحضيه باش ما يفيضش.

وها وهو واجد، نعمر الصحن بالطعام ونسقي بالحليب مع الخضرة.

وقدّمتو بألـف صحـة وهنـا👌🏻😋👌🏻.