نبدأ على بركة الله، في طنجرة الضغط نحط قطعة الدجاج (مغسولة مليح) مع حبة بصلة صغيرة مقطعة رقيق مع السمن والزيت وضفت (الفلفل الأسود، الكركم، وسكين جبير، رشة خفيفة من الزعفران) قليت كلش مليح مليح ثمّ ضفت الماء يكون ساخن جدا (ما لازمش نكثرو بزاف الماء) نغلق على الطنجرة ونخليها طيب على درجة حرارة متوسطة.

قبل ما طاب الدجاج حليت عليه وضفت الملح كنت نسيتو في الأول غلقت عليه وخليتو يطيب على نار متوسطة، كي طاب الدجاج حطيتو في صحن بجيه باش ينشف.

كنت نقيت البصلة وقطعتها شرائح نحط شوية زيت في كاسرونة نخليها تسخن ونفرغ فوقها البصلة ونخليها تتقلى على نار هادية بلا ما نضيف لها الماء.

ومرة على مرة نحرك حتى تذبال نضيف لها القليل من الملح نحرك مليح ونخليها طيب.
ملاحظة: ✔هاذ الطبق يجي بالبصل الأبيض أحسن أنا مكانش متوفر عندي استعملت الأحمر حتى هو يجي بنين لكن لونو يجي غامق.
معلومة على السريع:✔ كي تتقلى البصل مليح تتكرمل وتمد ذوق حلو.

ما لازمش نغفلو على البصلة من تكون طيب مرة على مرة نحركوها باش ما تتحرقش كي تنشف من الماء نضيف على راس الملعقة الصغيرة القرفة بودرة نحرك مليح ثم نضيف القليل من المرق اللي طاب فيه الدجاج.

نخلط مليح ونخليها تتجمر وتنشف من المرقة.

وهذاك الزبيب غسلتو مليح وخليتو يستقطر ضفت عليه ملعقة كبيرة سكر وعلى راس الملعقة الصغيرة قرفة بودرة خلطتهم مليح.

وضفتو للمرقة اللي طاب فيها الدجاج خليتو يغلي ويتشرب التوابل وينتفخ شوية.
ملاحظة: ✔استعملت الزبيب الأصفر الصغير يمكن تستعملو أي نوعية زبيب متوفر عندكم.

وقطعة الدجاج كي نشفت ذهنتها بالقليل من السمن من كل الجوانب حطيتها في صينية زجاج ودخلتها للفرن المسخن مسبقا حتى أصبح لونها ذهبي جميل.

جبت صحن التقديم في الأول صبيت البصلة من فوقها فرغت الزبيب ومن فوق حطيت قطعة الدجاج، طبق يجمع بين المالح ولحلو يجي بزاف😋🧅😋 بزاف بنين.

وقدّمتو بألــف صحــة وهنــا👌🏻😋👌🏻.