نحضر كل المكونات ونبدأ بإسم الله، في إناء واسع (جفنة) نحط المارغرين ورشة الملح وعطر السنيكرز والسكر الناعم وحبة بيض ونخلط بكف يدي مليح ثم نضيف الزيت ونخلط الكل جيداً حتى يصبح المزيج كريمي.
نصيحة: ✨يمكن خلط المكونات بالباتور (الضراب الكهربائي)

ثم ضفت القاوقاو محمص ومرحي متوسط نخلط الكل جيداً ونضيف المايزينة نغربلها وندخلها مليح، ثم نضيف الفرينة بالتدريج (نغربلها بطبيعة الحال)

حتى نتحصل على عجينة طرية وفي نفس الوقت متماسكة (نلموها فقط ما نعجنوهاش)، نغطي لعجينة وندخلها للثلاجة الوقت اللي ننظف فيه مكان العمل تقريبا 10 دقائق، وزنت العجينة 30غ للكرية.

في هاذ الوقت نحضّر الحشو خلطت كيلة بسكويت مرحي (استعملت بيفا) مع كيلة قاوقاو محمص ومرحي مع كيلة حلوة الترك نخلطهم جيداً ونلم بالكراميل (استعملت الكابريس السائلة) حتى نتحصل على خليط نقدر نشكلو كريات، وزنت 15غ للكرية.
ملاحظة: ✔إذا كانت الكابريس أو الطوفيا عاقدة بزاف نحطو فوق حمام مائي يسيح شوية باش نقدر نلم بيه كيما اي مثل يمكن إستعمال النيسلي كراميل.

نحل عجينة الصابلي على شكل بيضوي بين يدي وفي الوسط نحط كرية من الحشو نحاول نلم الجوانب جيداً ونحطها في قالب تارتولات (نص دائري) ونسقمها مليح.

بنفس الطريقة نكمل كل الكمية اللي عندي ندير ثقوب بمساعدة عود الشواء ندخل الصينية للفرن المسخن مسبقا على درجة حرارة متوسطة كي يطيب الصابلي نديموليه ونحطو فوق مشبك ونخليه يبرد جيداً.

في هاذ الوقت نوجد القلاصاج، ذوبت الشوكولا بالحليب (يمكن إستبدالها بشكولا بذوق البندق) وضفت عليها الزيت والقاوقاو محمص ومهرمش خشين وقلاصيت كل الكمية اللي عندي كما هو موضح في الفيديو.

الحبة اللي نقلاصيها نحطها في صينية مغلفة ببلاستيك غذائي أو ورق الطهي ونخلي الشوكولا تنشف.

ويقدّم بألف صحة وهنا 🍫😋🍫

يجي هشيش وبزاف بنين، يجي فيه ذوق السنيكرز. 💖🍫💖