نبدأ على بركة الله، في إناء نحط الفرينة مع الخميرة والسكر وبدور الخبز والحليب بودرة والملح نخلط الكل جيدا ونبدأ نضيف في ماء دافي بالتدريج
ملاحظة مهمة: الكيلة اللي استعملتها هي غرفية متوسطة.

نخلي لعجينة مرخوفة وتلصق في اليد، في الأخير نضيف الخل (يعتبر كمحسن للعجين). نضربها مليح باش يدخلها الهواء مدة 5 دقايق، ثم نضيف الزيت

ندخلها مليح في العجينة نغطيها ونخليها تخمر مدة 15 دقيقة نعاود نديقازيها ونضربها شوية (هاذ العملية تنقص علينا الدليك)، ونخليها تخمر للمرة الثانية.

كي تخمر لعجينة نوجد السميد الرطب وين نقرص الخبيزات مع الماء دافي باش نمسح يدي. نديقازي لعجينة (نخرج الهواء) ونقسمها على زوج خبيزات

نرمدها في السميد الرطب. ونحطهم فوق ورق الطهي، كما هو موضح في الصور. نغطيهم ونخليهم يرتاحو مدة 5 دقايق عاد نقرصهم.

نخليهم يخمــرو على خاطــرهم وفي هــاذ الوقت نكون شعلت الكوشة من تحت ومن فوق باش تسخن مليح (استعملت فرن السعادة روعة في طهي الخبز)، كي تسخن نرمي الخبزة الأولى بمساعدة ورق الطهي(نسحبها للصينية برك بلا ما نقلبها)، نقص على الفرن من تحت أقل درجة ونخليه من فوق على درجة متوسطة. نخليه يطيب يجي فارغ من الداخل نفس الطريقة طيبت الخبزة الثانية يدي لون ذهبي من فوق ولتحت إذا ما حمارش من تحت نقلب الخبزة باش تدي لون موحد (ما يديش وقت في الطياب تقريبا 10 دقائق فقط).

ويقدّم بألف صحة وهنا 😋👍🏻😋