نبدأ على بركة الله، أولا نحمص حليب بودرة ونخليه يبرد بجيه.

من جهة أخرى نحضر كل المكونات ونبدأ باسم الله، في إناء واسع حطيت المارغرين، الزيت، السكر الناعم، الحليب بودرة المحمص، رشة ملح مع مركز عطر الكراميل نخلطهم مليح بكف يدي حتى نتحصل على شكل كريمي.
ملاحظة: ✔يمكن إستعمال الباتور في الخفق أنا أفضل العمل باليد.
✔ يجب ان تكون المارغرين بحرارة المطبخ لتسهيل عملية الخلط.

ثم ضفت القاوقاو محمص ومرحي وحبة البيض دخلتهم مليح مع المكونات ثم بديت نلم بالفرينة (نغربلها بطبيعة الحال) بلا ما ننسى خمارة الحلويات.

نضيف الفرينة بالتدريج حتى نتحصل على عجينة طرية ما لازمش نيبسوها، خليتها ترتاح شوية، الوقت اللي نضف فيه سطح العمل.

كي تريح ندي شوية من العجين ونعمر لي مول (حسب الموجود) كي نكمل كل الكمية ثقبتها بعود الشواء كما هو موضح في الفيديو، نحطها فوق صينية وندخلها للفرن المسخن مسبقا على درجة حرارة متوسطة، ما تديش وقت في الطياب.
نصيحة مهمة: ✨كي تكون طيب عسيها بلاك تنتفخ شوية نورمال حلّى الفرن ديالك في الخمس دقائق الأولى قبل ما تنشف ونزليها بيدك، وإذا خفتي من هاذ المرحلة ما تستعمليش خلاص خميرة الحلويات.

وهي عاد دافية نديموليها من القوالب ونحطها فوق مشبك ونخليها تبرد تماما.
ملاحظة: ✔الحليب بودرة المحمص يزيدلها في البنة ويعزز ذوق الكراميل ويعطيها لون جميل.

للحشو إستعملت كراميل (الكابريس) يمكن تعويضه بطوفيا كراميل أو النيسلي كراميل أو أي وصفة صلصة الكراميل تكون ناجحة معاك، خديت منو حوالي 3 ملاعق كبار وضفت عليه الجوز (حمصتو شوية في فرن ساخن لازم نعسوه بلخف يتحرق) كسرتو بيدي فقط خلطتهم مع بعض حتى نساجمت المكونات.

عمرت القوالب أو القنيدلات بهاذ الحشو حوالي ملعقة صغيرة في كل حبة ومن جهة أخرى ذوبت شكولا بذوق البندق ضفت عليها ملعقة كبيرة زيت خلطت الكل جيدا وفرغت حوالي ملعقة كبيرة في كل حبة.

وكتزيين أخير حطيت من فوق نصف كرية الشكولاطة الجاهزة (شبيه الرافياللو بذوق الشكولاطة) ويبقى التزيين إختياري وحسب المتوفر.

واستمتعو بالبنة بألف صحة وهنا🥰 تجي بنينة 👌🏻😋👌🏻والعجينة تجي طرية وهشيشة👌🏻.

وشهية طيبة للجميع🥰💖🥰