الاول بنعمل الجرباسه(الخمر)
هي عباره عن قطعه عجيبنه بخدوها في اخر كل خبزه و بيشلوها في الدقيق لو مش موجوده ممكن نجيب من اي فرن عجينه رغيف فينو لو مش متوفر ممكن نعمل في البيت ب نص كوب دقيق عليها تلات أو اربع معالق ميه نلم بيهم الدقيق بس و و نعجنها كويس و نحطهم في كيس و عليهم نص كوبايه دقيق و نقفل الكيس كويس و نحطهم في مكان دافئ لمده تلات ايام

بعد التلات أيام هتلاقي حته العجين خمرت نحطهم في نص كوبايه مياه دافيه و عليهم معلقه صغيره خميره بيره(خميره الافران) و ندوبهم في المياه كويس و نحط عليهم كوبايه دقيق و نعجن فيهم كويس و نسيبهم حوالي ٤ ساعات هما في الأساس بيسبوها من باليل الصبح

تاني مرحله العصيده
هي عباره عن نص كوبايه دقيق و معلقه ملح صغيره عليهم نص كوب مياه مغليه و نقلب فيهم بسرعه لمنع تكتلات العجين و نضيف عليهم نص كوبايه مياه ساقعه علشان نبردهم و نقلب كويس فايده العصيده أنها بتخلي الرغيف يكون طري
بعد كده هنحط الجرباسه(العجينه اللي سبناها تلات ايام) مع العصيده و و نعجن فيهم كويس

ملحوظه :ممكن نستخدم دقيق اسمر مع ابيض و ممكن ابيض بس
نحط بقيت كيلو الدقيق علي العجينه و نعجن شويه شويه بالمياه لحد ما العجينه تلم معانا وتكون طريه و مش بتلزق في الايد نفضل نلت و نعجن شويه لحد ماتكون ناعمه و نسيبها ترتاح ربع ساعه

بعد كده مرحله التقطيع
نجهز الرده و الدوار (هي عباره عن اطباق بيتم صنعها من الورق او من الخشب) الاول نرش علي الدوار و بعد كده هي ناخد كوره من العجين نحطها في طبق فيه دقيق و نكورها الدقيق فايدته هنا انا هيحسن شكل الرغيف و يمنع انا يلزق في الايد

و نفرد الرغيف بالراحه و نسيبه يخمر في الشمس حوالي ٣ساعات
احنا كده دخلنا مرحله التخمير بعد ال٣ ساعات بنقلب الرغيف علي دوار تاني و نسيبه يخمر تاني حوالي ساعه

بعد كده مرحله التجريح بتكون بابره نضيفه بيستخدموها العجين بس و هي عباره عن تجريح العيش داير مايدور بالابره
و في قري صعيديه بيجرحوه ب تلات أو اربع زاويا من الجوانب

مرحله الخبيز
يسخن الفرن بدرجه حراره عاليه و يتحط الرغيف علي المطرحه(استند خشب مدور بيد) و يدخل الرغيف الفرن بياخد تقريبا ربع او تلت ساعه

لما بيطلع بيكون ناشف بس عشر دقائق بيطري