نبدأ بسم الله ونحضر صلصلة الطماطم تاعي ونجيب كسرونة نحط فيها حبات طماطم مقطعة انصاف ونحط عليها ملح وفلفل اسود وسنات ثوم وعكري حلو او حار وم ك طماطم مصبرة وم ك زيت وم ص سكر لكسر حموضة الطماطم ونحطها عالنار تطيب بعد ذلك نرحيها فالاشاوار ونحتفظ بيها على جنب

نحضر الان عجينة البيزا نجيب قصعة لوح ونحط فيها فرينة حسب افراد العائلة ونحط م ك سكر وم ك خميرة الخبز والزيت ونخلط الكل مليح ثم نسخن ماء دافي او حليب اذا توفر ونلم العجين تاعي

نتحصل على عجينة طرية نلمها مليح ونحطها في كيس بلاستيكي ونخليها تختمر

الخطوة الموالية نوحد الخضار تاعي نقص الفلفل الحلو شرائح والفلفل الحار والمعدنوس والزيتون الاخضر ثم نرجع للعجينة تاعي نعجنها ونشكلها كرية ونرش بالفرينة ونبدا نحل ونجيب سينية مدورة ندهنها بالزيت ونحط العجينة تاعي فيها ونحلها مليح

فالاخير نحط صلصلة الطماطم ثم نرش الفلفل الخلو شرائح نوزعو على كامل الصلصلة ثم الزيتون الاخضر وكذلك زيتون اسود والفلفل الحار ونحط اختياري جبن قطع نوزعو كامل عليها وندخلها الفرن يكون سخون مسبقا تطيب من تحت ثم نشعللها تنشف الطماطم ونخرجها ونحط عليها جبن مبشور

فالاخير هذا شكل البيتزا تاعي جات خفيفة وهشيشية بزااااف