الصينية المستعملة حجمها 23/23سم انا خرجتلي خمس قطع باتيسري لي طرونش و كانوا لاباس بيهم من ناحية الحجم

البسكويت الاول نطلعوا زوج حبات بيض مع 60 غ سكر حتى يتضاعف الحجم و هنا نزيدو الفانيلا و الفرينة لي نكونوا زدنالها ملعقة خميرة الحلوى و باش يجينا البسكويت خفيف نغربلو الفرينة كي نكونوا نضيفوا فيها الاضافة تكون على ثلاث مرات حتى نتحصلوا على مزيج خفيف و متماسك و نحطوه يطيب (يستوي) مدة عشر دقائق في الفرن بعدما كنا سخناه من قبل نفس الخطوة بالنسبة للبيسكوي بعطر الفراولة و لي حيكون اللون تاعوا وردي و هدا لي يعطينا شكل جميل فالمونطاج

كي يبردوا لي بسكويت تاعنا نقطعوهم على اثنين يعني يولي حجم البسكويت 11,5/23سم بالنسبة للسنيوة ديالي و نقوموا بصنع الكريمة نطلعوا الشانتيه مع الحليب و نزيدوا الياووغت

نبداو المونطاج نحط اول قطعة من البسكويت و نشربو بالسيرو و نحط طبقة من الكريمة و نحاولوا نساويو الوجه و نزيدو دوائر رقااااق من الفراولة ناكد رقاق باش مايفسدولناش الحبة فالتقطاع و نحطوا ثاني قطعة من البسكويت بلون مخالف و نشربوها و نديروا الكريمة و نزيدوا قطع رقاق من الموز و هاكدا حتى نكملوا باقي الطبقات و نغلقوا الوجه بالكريمة لي بقات معانا و نحطوها فالمجمد لحوالي ساعة

كي نشوفوها بردت و شدت روحها مليح نخرجوها و نجيبوا سكين تاع الخبز و نوجدوا طاس فيه ماء ساخن و بابيي ولا طرشونة نقية نحطوا السكين في الماء السخون و نقطع الاطراف يعني باش يكون عندنا وجه شباب و نتحصلوا على مستطيل يكون بلا زوائد القطع يكون كل مرة نقطعوا نحطو السكين في الماء الساخن حوالي نصف دقيقة و نحيه و نمسحوا و نقطع حتى نكمل الاربع جهات و فالاخير نقطع الحبات كيما اي مثل نحبوا مستطيل او مثلثات هدا اختاري و التزيين اختياري ايضا