هنجيب الفرخة نغسلها ونقطعها وننقعها في قليل من الماء والخل والملح والليمون بعدين هنجيب بولة نحط فيها ربع كباية زيت وملح وفلفل وملعقة كبيرة بابريكا وملعقة كبيرة كركم وملعقة صغيرة كزبرة ناشفة ونقلبهم كويس وننقع الفراخ فيهم مدة نصف ساعة

نحضر الرز بتاع المندي، انا عملته في طاجن فخار او ممكن في البيركس او صينية عادية، حطيت كوبين رز بسمتي غسلته وصفيته وحطيت الرز في الطاجن وضفتلهم عودين قرفة وورق لورا وليمونة مجففة وفص مستكة و٥ فصوص هيل و٥ فصوص من القرنفل ومكعب مرق وضيفتلهم ماء ساخنة فوق الرز بمقدار اصبعين ونضيف الملح والفلفل ومعلقة كبيرة سمنة ومعلقة زيت

ونرجع للفراخ بتاعتنا بنجيب شبكة ونحطها فوق طاجن معنديش شبكة ولا يهمك غطي الطاجن بطبقة سميكة من القصدير وبعدين اعملي فيه اخرام بخلة الاسنان وبعدين حطي الفراخ على الوجه واقفلي كويس عليها بطبقة ثانية من القصدير هتبقى شوية من خلطة الفراخ هنشيلها على جنب وتدخل الفرن حوالي ساعة ونص ونطلعها هنلاقي الفراخ استوت والرز اتشرب الماء واستوى

هنفتح على الفراخ الفويل وندهنها بخلطة الفراخ اللي مركونة وبعدين ندخلها تحت الشواية لحد ما الفراخ تأخذ لون وتطلع بنولع لها فحمة ونطفيها بشوية زيت علشان تكون بطعم وريحة الفحم ونقدمها زي ما نحب وصحتين