نوجد كل المكونات ونبدأ على بركة الله، نطحن القوفريط، في إناء نحط المارغرين ورشة الملح وقطرات من عطر الفريرو روشيه المركز.

نضربها مليح مليح بالباتور حتى يصبح القوام كريمي ثم نضيف القوفريط.

وننخفق حتى تتجانس المكونات، وفي الأخير نلم بالفرينة نكون غربلتها.

حتى نتحصل على عجينة مثل الصابلي طرية ومتماسكة، خليتها تريح مدة 10 دقائق وبديت نخدم بيها نوزن حجم الكرية 9 غ.

عمّرت القوالب السلكون (اخترت قالب على شكل قلب) حطيتهم في صينية وقبل ما ندخل الصينية للفرن درت ثقوب بواسطة عود الشواء ودخلت الصينية للفرن على نار متوسطة.

كي تفوت 5 دقائق في الفرن نعاود نخرج الصينية ونهبّط لعجينة كما هو موضح في الفيديو ونعاود ندخل الصينية للفرن يكمل الطياب.

كي يطيبو نخليهم حتى يبردو مليح عاد نديموليهم، نكمل كل الكمية بنفس الطريقة.

نوجد الحشو في غرفية نحط كيلة صغيرة مكسرات (خليط بين لوز وبندق) محمصة ومرحية خشين مع كيلة صغيرة كنافة محمصة ونلم بالشكولا الطلي، نخلي الحشو شوية خفيف كما هو موضح في الفيديو.

نعمر القلوب اللي عندي ونلصق كل زوج حبات مع بعض حتى نكمل كل الكمية، نخليهم بجيه.

ومن جهة أخرى نوجد القلاصاج، ذوبت الشكولاتة بذوق البندق وضفت عليها اللوز محمص ومهرمش خشين وقلاصيت كل الكمية اللي عندي.

و بألف صحة وهنا 👌🏻😋👌🏻

وشهية طيبة للجميع 😋💐😋