أول حاجة هننضف البطة كويس جدا جدا وننقعها ف ميا وملح وليمون ع ما نحضر الخلطة

هنفرم البصل مكعبات متوسطة لا كبيرة اوي ولا ناعمة خالص

هنحط البصلة ع النار مع معلقتين كبار زيت وشوية مية صغيرين جدا وملح وفلفل وكمون ما نكترش بهارات أوي

هنسيبها ع النار لغاية ما البصلة تشرب الميا اللي فيها وهقفل النار

كدة الحشو جهز والبطة منقوعة هنشطفها ونحشيها من جوا بخلطة البصل اللي عملناها

هنقفل البطة من عند البطن ومن عند الرقبة بتوث بيكس او نخطيها بإبرة وخيط المهم تتقفل كويس عشان البصل ما يطلعش منها

هنغلي ميا ع النار ونحط البطة تاخد غلوتين بسسسس ونشيلها نرمي الميا دي

ف حلة نضيفة هحط نقطة زيت وحتتين مستكة وانزل البطة عليهم واملي الحلة ميا

احط ملح ف الميا مع البطة واغطي الحلة ع نار عالية واسيبها تستوي مع نفسها خالص

بعد ما تستوي بطلعها من الشوربة احمرها ف شواية الفرن من كل الجوانب

ملحوظة البصل اللي جواها بيتاكل وطعمه حلو جدا جدا جداااااا

بعمل الرز بشوربة البط بنفس طريقة الرز العادي بس بزود له فلفل وكمون بسيط

بس كدة عملنا الاكلة الدمياطي المحترمة واللي الناس بتجيلنا من آخر الدنيا عشان تاكلها

بألف هنا وشفا ع قلبكم ❤❤❤