نضع في قصعة السميد والزبذة والملح والسكر والفاني وخليط السمن والزبذة الذايبة ونحبك بكف اليد مليح لمدة 10دقايق حتى يدخل السمن والزبذة مليح في السميد بعدها نغطيه ونخليه يرتاح من ساعة حتى 4 ساعات

نحضر الغرس نقيه مليح من النوى بمساعدة الزيت حوالي 2ملاعق هو يسهل نزعه ثم نضيف شوية قرفة الا ماتحبهاش يمكن الاستغناء عنها ثم نضيف الجلجلان و قطعة صغيرة زبدة طرية ونلم باليد بعدها نعمل حرابيش او اعمدة نتركها جانبا

نرجع للعجين نأخذ جزء منه فقط ونضيف له خليط من الحليب وماء زهر بشوية حتى نحصل على عجين يمكن تشكيله (لا نأخذ العجين كله لان سميد يشرب واذا بقينا كل مرة نضيفو الحليب راح يروح البساس ويصير المقروط يابس لذلك نأخذ بشوية)

بعدها نأخذ العجين ونعمل حربوش خشين فوق طاولة ثم نقوم بفتحه في الوسط طوليا ثم نأخذ حربوش التمر (معجون التمر)ونضعه بداخله ثم نغلق العجين عليه ونلفه حتى نحصل على الحجم المطلوب كما في الصورة