بنبلش براس الملفوف من تحت عند القاعدة نشيلها بشكل مربع واذا ما انشالت عادي ، بطنجرة كبيرة بنكون مسخنين مي ، بنزل الملفوف فيه وبنسلقه حتى اوراقه يفتحو شوي ويصيرو يطلعو بسهولة معكم.

عبال ما ينسلق بنجهز الحشوة ، الرز واللحمة والبهارات وشوية زيت نباتي عشان يفتح الرز ، طبعا انا حطيتلكم عيار بس انا كله ع البركة بشتغل

بس ينسلق الملفوف بنمسك الورقة وبنشيل العرق القاسي وبنصير نحشيه ونلف

بنرتبه بطنجرة تيفال عشان ما يلزق احسن ، ببلش بالعروق بحطهم تحت بالقاع وبحط بين الطبقات ثوم ، زكاوته الثوم ، وبس اخلص بحط ملح كمية منيحة وكمون كمان وبكون غالية مي مدفيتها وبحط صحن يكمر الملفوف عشان ما يطلع الرز معكم وبحط المس تغطي الملفوف شوي ، وبتركه ع نار عالية يغلي ١٠ د وبس يغلي بوطي الغاز وبعيرله ٣٠ د ، وبختبره بطلع حبة اشوف استوى الرز

اخر اشي بحط عصير ليمون حبتين او حسب الذوق ، عند الاكل بحط ليمون واللي بده بعصر وبقدمها وصحة وعافية ، بقدم جمبها قلاية بندورة