لتحضير الكايك: بنخفق الزيت مع السكر.

بنضيف البيض بالتدريج وبنخفق. والفانيليا وبنخفق.

بنخلط الطحين مع الملح والبايكنج باودر.

بنضيف خليط الطحين بالتناوب مع الحليب فوق خليط البيض والسكر وبنحرك منيح.

بندهن قالب الكايك بالزبدة وبنبطنو بورق الزبدة وبنسكب فيه خليط الكايك وبندخلو ع فرن محمى مسبقا من تحت بس على درجة حرارة متوسطة اقرب للهادية وما بنفتح الفرن قبل نص ساعة ابدا.

بنختبر نضج الكايك بعود خشب (اذا طلع نضيف معناها الكايك صار جاهز)

بس يجهز الكايك بنشيلو من الفرن وبنتركو يبرد شوي بعدين بنقلبو ع شبك وبنشيل الجوانب بسكين وبنقسمو لطبقتين.

عملت قالبين كايك ف صار عندي 4 طبقات.

لتحضير الحشو: بنخفق الدريم ويب مع الحليب البارد ع سرعة عالية لحد ما تتكاثف الكريمة بعدين بنضيف فوقا الجبن الكريمي والقشطة والحليب المكثف وبنخفق لتتجانس المكونات كتير منيح.

بنبدا بتطبيق الكايك: بنسقي كل طبقة بعصير الاناناس بعدين بنضيف كمية من حشو الكريما وقطع الفواكه وبنكرر العملية لحد ما تنتهي الطبقات.

بنحط القالب بالبراد ليتماسك وبهالوقت بنجهز كريما التغليف.

لتجهيز كريما التغليف: بنخفق الدريم ويب مع الحليب لحد ما يتكاثف.