نبدأ على بركة الله، أولا بعجينة الطاكوس، في إناء نحط الفرينة، ملح، زيت الزيتون، حليب بودرة والسكر والخميرة، ونبدأ نلم بالماء يكون دافيء حتى نتحصل على عجينة متماسكة نعجنها مليح حتى تولي رطبة وملساء، نغطيها ونخليها ترتاح مدة ساعة.
ملاحظة مهمة: الكايس اللي عبرت بيه الفرينة يرفد 170 ملل.

كي ترتاح نقطعها إلى كريات متساوية (عطاتني 5 كريات متوسطة) نخليهم يرتاحو 5 دقائق في هاذ الوقت نشعل على الطاجين اللي نطيبو فيه المسمن باش يسخن مليح، نجيبو الكرية الأولى نحلوها مليح بالحلال (لازم يكونو رقاق).

ونطيبهم مباشرة أي الكرية اللي نفتحها نطيبها، كي نحطها فوق الطاجين نقلبها في كل مرة تدي لون ذهبي خفيف بلا ما نكثر عليها الطياب باش ما تيبسش اللي طيب نلفها في سربيتة ونحطها في كيس بلاستيكي لحين الإستعمال باش تقعد معانا طرية.

بالنسبة للدجاج نحط في إناء قطع الدجاج مع التتبيلة (المذكورة أعلاه) مع علبة ياغورت طبيعي ونخلط الكل جيدا حتى تتجانس كل المكونات نغطي الإناء ببابي فيلم وندخلو للثلاجة مدة ساعة، كي تفوت هاذ الساعة نسخن المقلاة جيدا نحط فيها القليل من الزيت ونرمي قطع الدجاج.
ملاحظة مهمة: من الأفضل مين تكون تريح لعجينة ندير تتبيلة الدجاج باش يتشرب مليح

ونخليه يطيب على نار فوق المتوسط، يطيب ويشرب كامل السوائل اللي فيه ونطفي عليه.

من بعد نوجد كفتة اللحم المفروم نحطها في إناء ونضيف عليها التوابل (المذكورة أعلاه) نحركها مليح حتى تتجانس كل المكونات ندير شوية زيت في مقلاة ونخليها تسخن نضيف عليها الكفتة ونخليها تتشحر على نار متوسطة، كي طيب نحيها، وفي نفس المقلاة نضيف قطراة من الزيت ونشحّر حبة بصلة مليح من الأحسن تكون البصلة البيضاء وحتى هي نحيها بجيه ونخليها لحين الإستعمال.

في هاذ الوقت نحضرو الصلصة الجزائرية في غرفية نحط المايوناز مع الزيت وباقي الكونات ونخلط الكل جيدا حتى تنسجم المكونات ونتحصلو على أحلى صلصة فيها قرمشة لذيذة، نقليو البطاطا وبهذا نكونوا كملنا التحضيرات المسبقة نوجد كل المكونات ونبدأ نعمر خبز الطاكوس اللي عندي.

ندهن الخبز بالصلصة الجزائرية ثم ندير قطع الدجاج ثم صلصة الجبن حطيت👈🏻 الوصفة من قبل يمكن تفقد الطريقة بالتفصيل من خلال هذا الرابط👇🏻 نضيف حبات من البطاطا المقلية ومن فوق نحط الجبن الخاص بالساندويتشات.

نطوي الخبز كما هو موظح في الصور بنفس الطريقة حتى نكمل كل الحبات اللي عندي.

لفيت خبز الطاكوس بالألمنيوم وحطيتو فوق الطاجين الخاص بالمطلوع وعصرت عليه من فوق بالمهراز تاع لحديد (لازم تكون حاجة ثقيلة)، أما إذا توفرت عندك البانينوز حميها وحطي حبات الطاكوس وبريسيهم.

قدّمتهم مع الصلصة الجزائرية والقليل من البطاطا المقلية اللي شاطت لي وبألف صحة وهنا 😋👌🏻😋 أحسن من المحلات 😉