بسم الله الرحمن الرحيم.
أول شي بنغسل كاسة الرز وبننقعها بكمية غامرة من الحليب يلي رح نستخدمو، بنفرغ الحليبات بطنجرة غير لاصقة على نار هادئة جداً بنتركهن و وبنترك الرزات منقوعات هيك لمدة ١٥ دقيقة.

ننتبه على الحليب ونحركه كل شوية مشان ما يلصق بالسفل وإذا اتبعتوا كل الخطوات بشكل صحيح مارح يلصق شي بالطنجرة، بعد ربع ساعة بيدفى الحليب بنفرغ كمية الرز يلي عنا فيه، بنحركهن كل ٥ دقائق تحريكة وبنتركهن لحتى يستوو على مهلن تقريباً رح ياخدو شي ٤٠ دقيقة على نار خفيفة، لا تنسوا التحريك مهم جداً وبيشل الإيدين كمان لهيك جيبو شي تتفرجو عليه عالتلفون او اسمعو شي مفيد 🥲.

بعد ما يرتفع الرز لفوق بيكون الرز بالحليب استوى بنجرب ندوق الرزاية بتكون ١٠٠/١٠٠ اذا بتحسوها عم تذوب دوبان 👌🏻، هلأ بكاسة الحليب الباردة يلي تركناها على جنب بنحط ٣ ملاعق مجبلة نشا وبنحركهن لحتى يدوبوا بالكاسة (النشا بتتدوب بسائل بارد دائماً وإلا بتكتل) هلأ بنحط النشا بالطنجرة مع التحريك المستمر، بعدين بنضيف كاسة السكر وبنحرك شوية، وبنتركهن يندمجو كمان شي ١٠ دقائق.

لما نشوف انو وصلنا للكثافة المطلوبة والقوام السميك بنطفي النار (اذا حسيتو مريء جيبو شوية ماء باردة ودوبو فيها كملن ملعقة نشا وضيفوها على الحليب وحركوها) لما نطفي النار بنضيف النكهة يلي بنرغب فيها ماء ورد او ماء زهر او حتى برش ليمون يلي بتحبوه ومتعودين عليه 💚.

هلأ صبوه بالزبادي يلي خصصتوها الكمية هي بتكفي ٦ زبادي و ٢ صغار، كمية مناسب للعائلة و للضيوف واذا بدكن تزيدو الكمية تأكدو تزيدو العيارات بحسب الزيادة، يزين بحسب المتوفر عندك انا بحبو سادة جداً وألف صحة وهنا. 🥰