प्रथम सफेद वाटाणे रात्रभर किंवा आठ तास भिजवून घ्या. नंतर त्यात पाव चमचा हळद, पाव चमचा हिंग घालून कुकरमध्ये ४-५ शिट्ट्या घेऊन शिजवून घ्या. बटाटी सोलून त्याच्या छोट्या फोडी कराव्यात.

कांदे, टोमॅटो बारीक चिरून घ्या. तेल तापवून त्यात हिंग घालून कांदा घालून परता. त्यात आले-लसूण पेस्ट घालून खमंग वास येईपर्यंत परता.

परतलेल्या कांद्यात टोमॅटो व सर्व मसाले घालून पुन्हा परता. उकडलेले वाटाणे चमच्याने थोडे घोटून घ्या.आता या मिश्रणात उकडलेले वाटाणे व बटाट्याच्या फोडी घालून पाणी घाला. चवीनुसार मीठ घालून झाकण ठेवून बटाटी शिजेपर्यंत रगडा शिजवून घ्या. जरूर वाटल्यास थोडे पाणी घालून रगडा थोडा पातळच ठेवा.

पॅटिससाठी उकडलेले बटाटे सोलून त्याचा लगदा करावा. त्यात पॅटिससाठी दिलेले सर्व मसाले, आले-लसूण पेस्ट, कोथिंबीर व मीठ घालून एकजीव करावे. या मिश्रणाचे छोटे गोळे करून चपटे वडे करावेत. तव्यावर तेल घालून दोन्ही बाजूने पॅटिस खरपूस तळून घ्यावेत.

आता एका डिशमध्ये तयार पॅटिस ठेवून वरून गरम रगडा घाला. वरून पुदिन्याची चटणी, चिंच-खजूर चटणी, शेव, कोथिंबीर घाला. वरून लिंबू पिळून गरमागरम खायला द्या, 'रगडा पॅटिस '