मटण स्वच्छ धुवून त्याला आलं लसूण पेस्ट, मीठ, हळद आणि तिखट पूड लावून १५ मिनिटे मॅरीनेट करायला ठेवावे. नंतर कुकर मधे तेल घालून त्यात दोन बारीक चिरलेले कांदे घालून ब्राऊन होईपर्यंत परतावे. मग त्यात काश्मीरी मिरची पावडर घालून लगेचच १ वाटी गरम पाणी घालावे म्हणजे मटणाला छान लाल रंगाची तर्री येते. त्यावर मॅरीनेट केलेले मटण आणि कोल्हापूरी मटण मसाला घालून परतावे.

एका कढईत थोडं तेल घालून त्यात धणे जीरे लवंग मिरे दालचिनी तमालपत्र घालून परतावे मग त्यात १ कांदा मोठा चिरुन घालून परतणे. नंतर सुके खोबरे घालून परतावे. खोबर्याचा ब्राऊन कलर लशझाल्यावर त्यात ओलं खोबरं घालून परतावे. हे मिश्रण गार झाल्यावर मिक्सरमधून बारीक वाटून घ्यावे.

परतलेल्या मटणामधे कांदा खोबर्याचं वाटण घालून परतून मग त्यात पाणी घालून मटण चांगले नरम होईपर्यंत शिजवावे. मी मटण फ्युचूरा कुकर मधे बारीक गॅसवर ८ मिनिटे शिजवले. मटण एकदम कोवळे होते त्यामुळे लवकर शिजले. साध्या कुकर मधे ८ ते १० शिट्या काढून मटण शिजते. किंवा मग पातेल्यात मटण शिजवताना झाकणावर पाणी घालून थोड्या थोड्या वेळाळे झाकणावरचं गरम पाणी मटणात घालत मटण शिजवावे.

वडे बनवण्यासाठी वड्यांच्या भाजणीच्या पीठात मीठ आणि पाणी घालून पीठ भिजवून घ्यावे आणि १० मिनिटे पीठ मुरण्यासाठी ठेवावे. नंतर त्या पीठाचे गोळे करून एका प्लास्टिक पेपरवर किंवा बटर पेपर वर तेल लावून त्यावर पीठाचा लहान गोळा ठेवून बोटांनी दाब देऊन गोल आकाराचे वडे थापावे. काही वड्यांच्या मधे बोटाने भोक पाडून पण वडे बनवावे. छानच खमंग खुसखुशीत वडे तयार होतात.

कढई मधे तेल घालून गरम तेलात थापलेले वडे अलगद सोडून मध्यम आचेवर तळून घ्यावे. खमंग खुसखुशीत वडे मटणा बरोबर खायला फार छान लागतात.

एका प्लेटमधे कांदा, टोमॅटो, काकडी आणि लिंबाच्या फोडी ठेवून गरमागरम मटण आणि गरमागरम वडे सर्व्ह करावे