दुधी भोपळा सालून व धुऊन घेणे. सुरीने त्याचे मध्यम जाडसर आकाराचे,गोल काप करून घेणे. मध्यम आकाराच्या बाटलीचे टोपण घेणे. मी हिंग डबीचे झाकण घेतले आहे.

एक गोल काप घेऊन त्याच्यामध्ये झाकण ठेवणे व दाबून मधला गोल करून घेणे. अशाप्रकारे सर्व गोल रिंग्स तयार करून घेणे.

लाल तिखट व मीठ रिंग्स् ला लावून, चोळून बाजूला ठेवणे. एका बाऊलमध्ये बेसन पीठ व तांदळाचे पीठ घेणे.

सर्व मसाले घालून घेणे. ओवा हाताने चोळून त्यात घालावा. सर्व व्यवस्थित मिक्स करून घेणे. थोडे थोडे पाणी घालून पीठ भिजवून घेणे.

गॅसवर कढईत तेल तापत ठेवणे. भिजवलेल्या पिठात थोडी कोथिंबीर चिरून घालणे. पीठ घट्ट वाटत असल्यास, एक टेबलस्पून पाणी घालून, हलवून घेणे. दोन-तीन रिंग पिठात बुडवून घेणे.
पीठ व्यवस्थित निथळून घेणे.

पिठात बुडवून व ब्रेडक्रम्स मध्ये घोळवून घेणे.नंतर तेलात सोडावे. कढईत जेवढे मावतील, तेवढे घालून घेणे. दोन्ही बाजूने छान लालसर होईपर्यंत तळून घेणे.
गॅस मध्यम आचेवर ठेवावा.
*माझ्याकडे आज ब्रेडक्रम्स नव्हते, म्हणून मी लावले नाही. तसेच तळले. तेही छान लागतात.

अशाप्रकारे सर्व भजी तळून घेणे. टोमॅटो सॉस बरोबर किंवा नुसती खाल्ली तरी छान लागतात.