प्रथम आपण उंबरांच्या पारीसाठी बेसन, गव्हाचे पीठ, अर्धा चमचा तिखट, एक चमचा तेल, थोडीशी हळद, चवीनुसार मीठ हे सर्व मिक्स करून घट्ट मळून घ्यावे..

कढईत एक चमचा तेल गरम करून त्यात कांदा घालून मंद आचेवर गुलाबी होईपर्यंत परतून घ्यावे...कांदा व्यवस्थित परतून झाला कि त्यात सुक्या खोबर्याचा किस घालून भाजून घ्यावा, ह्यातच बारीक चिरलेली कोथिंबीर, चवीनुसार मीठ व काळा मसाला घालावा..सारण थंड होण्यासाठी बाजूला ठेवून द्यावे. (ह्यात तुम्ही चमचाभर खसखस आवर्जून घाला, मला ईथे खसखस वापरण्यावर प्रतिबंध असल्याने मी ईथे ती वापरली नाही)

कढईत तेल गरम करून त्यात मोहरी तडतडल्यावर हिंग, हळद घालून बारीक केलेला लसुण, कढीपत्ता टाका..लसुण लालसर झाला कि त्यात भरडा व गव्हाचे जाडसर पीठ घालून खमंग वास येईपर्यंत भाजावे...पीठ भाजल्यानंतर त्यात दाण्याचा कुट घालावा..

वरील मिश्रणात दोन चमचे काळा मसाला घाला, आता ह्यात पाणी, चवीनुसार मीठ व एक मोठा चमचा तिखट घालून ऊकळी येईपर्यंत सतत ढवळत राहावे जेणेकरून पिठाच्या गुठळ्या होणार नाहीत..

आता आपण मळलेल्या पिठाचे उंबरं तयार करून घेऊया..हातावर पिठाचा गोळा घेऊन मोदकाच्या पारीप्रमाणे पारी बनवून त्यात सारण भरून घेऊन त्याला उंबरांप्रमाणे आकार द्यावा..

तयार करून घेतलेली उंबरे ऊकळत असलेल्या येसर आमटीमध्ये सोडावी..उंबरे शिजल्यावर आमटीमध्ये वर येतात..(भरडा, कणीक व काळा मसाला ह्यांच्या मिश्रणाला 'येसर' असे संबोधले जाते)

तयार आहे खमंग, झणझणीत अशी ही मराठवाड्याची खासियत "उंबरांची आमटी"