प्रथम पोहे चाळणीत घेऊन पाणी घालून भिजवून घ्यावेत. पोहे निथळत ठेवावेत. कांदे, बटाटे सोलून घ्यावेत. कांदे जाडसर चिरावेत. मिरच्यांचे तुकडे करावेत. बटाट्याच्या लहान फोडी कराव्यात. कोथिंबीर बारीक चिरावी.

कढईत तेल गरम करून त्यात राई-जिऱ्याची फोडणी करावी. त्यात हिंग, मिरच्या व कडीपत्ता घालून वर कांदा घालावा. त्यावर बटाटी व मटार घालून गॅस मंद करून एक वाफ काढावी.

मटार व बटाटा अर्धकच्चा शिजल्यावर त्यात हळद, थोडे मीठ घालून ढवळावे. बटाटा व मटार पूर्ण शिजल्यावर त्यात साखर व मीठ घालून मिक्स करावे. त्यात भिजवलेले पोहे घालून एकसारखे करून घ्यावे.

तयार पोह्यांना दणदणीत वाफ येऊ द्यावी. लिंबू पिळून एकसारखे करावे. गरमागरम पोहे वरून ओले खोबरे व कोथिंबीरीने सजवून खायला द्यावे.