चणाडाळ धूवन पाच ते सहा तास भिजवून ठेवावी. चणाडाळ एका पातेल्यात घेऊन पाणी घालून उकळत ठेवावी.चणाडाळ इतकी मऊ शिजली पाहिजे की बोटाने दाबल्यावर सहज तिचे पीठ झाले पाहिजे.

आता गुळ बारीक चिरून घ्यावे शिजलेल्या डाळीतले पाणी काढून ती पूर्ण निथळून घ्यावी. त्यामध्ये गूळ एकत्रित करावा आणि पुन्हा मंद आचेवरती शिजवत ठेवावी. मिश्रण सतत हलवत रहावे चणाडाळ आणि गूळ एकसंध गोळा झाला, मिश्रण चांगले मिळून आले कि गॅस बंद करावा.मिश्रण बरोबर तयार झाले हे कसे ओळखावे तर त्यामध्ये तुमचा जो चमचा असेल तो व्यवस्थित उभा राहिला पाहिजे खाली पडता कामा नये. म्हणजे पुरणाची डाळ शिजून मिश्रण तयार.

एका पराती मध्ये समप्रमाणात मैदा आणि गव्हाचे पीठ, चवीनुसार मीठ आणि चिमूटभर हळद घालून मळून घ्यावे. पीठ सैलसर भिजवावे घट्ट मळू नये, तेलाने चांगले तिंबुन दोन ते तीन तास ठेवून द्यावे. चणा डाळीचे मिश्रण थंड झाल्यावर पुरणयंत्रातून पुरण तयार करून घ्यावे.

पूरणामध्ये तुमच्या आवडी नुसार जायफळ पावडर किंवा वेलची पावडर घालून एकजीव करून गोळा करून घेणे. आता पिठाची पारी तयार करून घेणे पिठाची पारी ज्या आकारात असेल त्याच्या दुप्पट सारण घ्यावे चांगले तूप लावून त्यामध्ये पुरणाचा गोळा भरून पारी बंद करून घ्यावी.

हलक्या हाताने पुरणाची पोळी लाटून घ्यावी. गॅस वरती खरपूस तुपावर भाजून घ्यावी. गरमागरम पुरण पोळी साजूक तुपासोबत सर्व्ह करावी!