दुधी घेताना जरा मोठाच बघून घ्यावा, किंवा दोन दिवस तसाच ठेवावा, म्हणजे आतील पाणी सुकून जाईल. दुधी सोलून, आतील बिया काढून त्याचे मोठे तुकडे करावेत.

तुकडे मोठेच ठेवावेत, नाहीतर शिजून मऊ होतील. चाळणीवर ठेवून हे तुकडे दहा मिनिटे वाफवून घ्यावे. या वाफवलेल्या दुध्याचे मोठे 2 इंचाचे चौकोनी तुकडे करावेत. या तुकड्यांना टूथपिकने टोचून घ्यावे.

पॅनमध्ये किंवा पसरट भांड्यात साखर घेऊन साखरेच्या अर्धे पाणी घालून गॅसवर ठेवावे. साखर विरघळली की त्यात अर्ध्या केशराच्या काड्या व वेलचीपूड घालून दोन मिनिटे पाक उकळवावा.

पाकात टोचलेले दुधीचे तुकडे नीट पसरवून लावावे. गॅस मंद करून पाच मिनिटे झाकण ठेवून शिजू द्यावे. पाच मिनिटांनी तुकडे उलटे करून पुन्हा झाकण ठेवून शिजवावे. अशा तऱ्हेने दोन्ही बाजूने दुधीने पाक शोषल्यावर ते तुकडे ताटात काढून दुसरे तुकडेही असेच पाकात शिजवून घ्यावे.

सर्व तुकडे शिजल्यावर वरून बदाम-पिस्त्याचे काप लावून सजवावे. गरम - थंड कसेही खायला द्यावे. पण थंडच छान लागतात. मग करणार ना दुधीचा पेठा ?