अळूची पाने स्वच्छ धुवून पुसून घ्यावीत. पानाच्या पातळ शिरा काढून घ्याव्यात.पाने उलटी करून शिरा असलेल्या भागावरून लाटणे फिरवावे म्हणझे शिरांचा ताठरपणा मोडला जातो. पाने सपाट होतात. पानांवर मसाला व्यवस्थित पसरला जातो.

दालचिनी,खसखस,जीरे,लवंगा भाजून घ्यावेत. थंड झाल्यावर मिक्सर ला पूड करून घ्यावी.नारळामध्ये कोथिंबीर, मिरची, थोडेसे पाणी घालून बारीक वाटून घ्यावे. वाटलेला नारळ एका भांड्यात काढावा. त्यामध्ये बेसन, चिंचेचा कोळ, गूळ, लाल तिखट, हळद, मीठ, वाटलेला मसाला,घालून चांगले मळुन घ्यावे.घट्टसर करून घ्यावे. वाटल्यास थोडे पाणी घालावे. मिश्रण पातळ नसावे तसेच एकदम घट्ट गोळासुद्धा नसावा.. सगळं नीट एकमेकांत मिसळलं की त्याची चव बघायची. ती मस्त आंबट, तिखट, गोड लागली पाहिजे. जरा चिकटसर होईल.

उपलब्ध असलेल्या अळूच्या पानांपैकी मोठे पान आधी घ्या व त्याला तयार मिश्रण लावा. त्यावर मध्यम आकाराचे आणि सर्वात वर लहान अशाप्रकारे मांडणी करा. जर लहान पान बेस म्हणून घेतले तर रोल निट होणार नाही. उलट सुलट अशा प्रकारे पाने एकावर एक लावा.मसाला लावून झाला की डाव्या-उजव्या बाजूच्या कडा दुमडायच्या आणि देठाच्या बाजूने गुंडाळी करायला सुरुवात करायची. गुंडाळी व्यवस्थित जरा दाबून करायची.

शक्यतो 5 ते 6पानांपेक्षा जास्त पाने एका रोलसाठी वापरू नका त्यामुळे रोल जाडीला जास्त होतो, तसेच घट्ट वळला जात नाही आणि अळूवडी तळताना तेलात सुटण्याचा संभव असतो. दोन-तीन गंुडाळ्या झाल्या की, मोदकपात्रातील जाळीवर ठेवाव्यात आणि वाफवून घ्याव्यात.मोदकपात्र नसेल, तर नेहमीच्या एखाद्या पातेल्यावर जाळी ठेवूनही गुंडाळ्या उकडता येतात. उकडल्यावर गुंडाळीचा सुरेख उंडा तयार होतो. हा उंडा थंड झाल्यावर त्याच्या गोल चकत्या कापाव्यात.रोल एकदम छान घट्ट बांधला गेला पाहिजे म्हणजे अळूवड्या तळल्यावर तुटत नाहीत.

उकडलेल्या अळूवडीला तिळाची फोडणी घालून तेलात सोनेरी रंगावर परतून घ्याव्यात. डीप फ्राय नको असेल, तर शॅलो फ्रायही करता येतात. पण कशाही केल्यात तरी तोंडात टाकताच त्यांची आंबट-गोड चव मात्र जिभेवर रेंगाळली पाहिजे.