बाऊलमध्ये मैदा घ्या. बेसन,मीठ, ओवा(अजवाईन) घालून मिक्स करा.ओवा हातावर चोळून टाकावा जेणेकरून त्याची चव आणि सुगंध छान लागतो.कडकडीत तेलाचं मोहन घालावं.तेल थोडं कोमट असतानाच मिश्रण एकजीव करून घ्यावे.थोडे थोडे पाणी घालून कणिक मळून घ्यावी.कणिक घट्टसरच असली पाहिजे.15 मिनिटे कणिक झाकून ठेवा.

गॅसवर पॅन गरम करत ठेवा.सुके खोबरे घालून हलका सोनेरी रंग येईस्तोवर भाजून घ्या. खोबरे थंड होण्यासाठी ठेवा. त्याच पॅनवर मध्यम आचेवर धणे, जिरे, बडीशेप, तीळ, खसखस छान भाजून घ्या.भाजलेले मसाले,भाजलेले खोबरे मिक्सरच्या भांड्यात टाका.लाल तिखट, गरम मसाला, चवीनुसार मीठ, आवडीनुसार साखर घाला. सर्वांची जाडसर भरड(पावडर) बनवा.बाकरवडी मसाला तयार.तुम्ही तुमच्या आवडीनुसार तिखट गोड च प्रमाण कमी जास्त करू शकता

मळून ठेवलेली कणिक घ्या. थोडी मळा,चपातीच्या गोळ्यापेक्षा थोडा मोठा गोळा घेऊन चपाती लाटा. ही चपाती कडेने जाडसर व मध्ये थोडी पातळ या प्रमाणे लाटावी.चपातीवर चिंचगुळाची चटणी पसरवा. मिक्सर मधून काढलेला मसाला व्यवस्थित पसरवा. त्यावर थोडीशी शेव घाला. काठावर काही अंतर सोडा नाहीतर रोल करताना मसाला बाहेर पडेल.

हलक्या हाताने मसाल्यावर लाटणे फिरवा. आता हलक्या हाताने घट्ट असा दाबून रोल बनवा.सुरीने छोटे छोटे काप करा.कापलेल्या बाकरवड्या हलक्या हाताने दाबा म्हणजे तळताना मसाला तेलात बाहेर पडणार नाही.वड्या जास्तच दाबू नका. वडीने आपला आकार कायम ठेवला पाहिजे.

गॅसवर तेल गरम करा. वड्या गरम तेलात टाकून मध्यम आचेवर गोल्डन ब्राऊन तळून घ्याव्यात.चहासोबत सर्व्ह करा.बाकरवड्या थंड झाल्यावर हवाबंद डब्यात ठेवाव्यात.