तांदूळ नीट करून स्वच्छ धुऊन घ्यावा. त्यानंतर तांदळाच्या दुप्पट पाणी व आवश्यकतेनुसार मीठ, तमालपत्र, दोन-तीन लवंगा, पाच-सहा काळीमिरी, अर्धा इंच दालचिनी तुकडा घालून अर्धकच्चा भात शिजवून घ्यावा. वर सांगितलेल्या भाज्या स्वच्छ धुऊन कट करून घ्याव्यात. पनीरचे क्युब करून घ्यावेत.

गॅसवर पातेल्यात आवश्यकतेनुसार तेल गरम करावे. त्यात मिरच्या, तमालपत्र घालावे, कांदा, टोमॅटो परतावे, आले-लसूण पेस्ट, परतावी. कट केलेल्या भाज्या, गरम मसाला, लाल तिखट, हळद, बिर्याणी मसाला व मीठ घालून परतावे. नंतर त्यात दही घालावे. चवीनुसार मीठ घालून पाच मिनिटे झाकण झाकून एक वाफ आणावी.

शिजवून घेतलेल्या भातापैकी काही भाग बाजूला करावा त्यानंतर त्याचे लेयर देण्यासाठी वेगवेगळे दोन हिरवा व केशरी फूड कलर घालून भाताचे भाग करावेत. वर सांगितल्याप्रमाणे भाजीला वाफ आल्यानंतर, त्यात पनीर क्युब घालावेत. एक ते दीड ग्लास पाणी घालावे.

भाजीला उखळी आल्यावर, त्यातील भाजीचा काही भाग व पनीरचे क्युब काढून बाजूला ठेवावे. पातेल्यातील उरलेल्या भाजीत कपभर पाणी घालून त्यावर पांढरा भात पसरवावा, त्यावर पनीर व भाजीचा थर लावावा, त्यावर पुन्हा पांढरा भात, केशरी, हिरवा भात असे थर द्यावा.एक कप दूध वरून घालून शेवटी झाकण झाकावे. दहा मिनिटे भाताला चांगली वाफ येऊ दयावी.