सर्व सामग्री एकत्र ठेवावी. सिमला मिरची, कोथिंबीर बारीक चिरून घ्यावा. गाजर किसून घ्यावे. त्यानंतर एका मिक्सर पॉट मध्ये टोमॅटोच्या फोडी बीट च्या फोडी, आलं आणि लसूण टाकून छान बारीक करून घ्यावे.

फ्लॉवरचे तुरे मिठाच्या पाण्यात धुऊन घ्यावे. एका भांड्यात फ्लॉवरचे तुरे आणि हिरवे मटार आणि एका भांड्यात बटाटे ठेवून कुकरमधून उकडून घ्यावे. त्याचप्रमाणे कांदे बारीक चिरून घ्यावे. इतर मसालेही जवळ ठेवावे. त्याचप्रमाणे एका बाऊलमध्ये चिरलेल्या कांदा पैकी अर्धा कांदा आणि थोडी कोथिंबीर टाकून मिक्स करून ठेवावे. पावभाजी सर्व्ह करतांना हे मिक्स सर्व्ह करावयाचे आहे.

कुकर थंड झाल्यानंतर उकडलेले फ्लावर मटर आणि बटाटे मॅशरने मॅश करून घ्यावे. आता गॅसवर एका पॅनमध्ये तेल आणि बटर टाकून ते गरम करावे. जीरे टाकून ते तडतडल्यावर त्यात एकूण कांद्यापैकी अर्धा कांदा टाकावा.

कांदा मिनिटभर परतून घेतल्यानंतर त्यात टोमॅटोची तयार केलेली प्युरी टाकावी. ती चांगली परतून घ्यावी. नंतर त्यात बारीक चिरलेली सिमला मिरची आणि गाजराचा कीस टाकावा.

मिक्स करून दोन मिनिट ते शिजू द्यावे. त्यानंतर त्यात हळद, लाल तिखट, कश्मीरी लाल तिखट टाकावे. आणि चांगले मिक्स करून घ्यावे. नंतर त्यात थोडी कोथिंबीर आणि कसुरी मेथी हातावर चोळून टाकावी.

मिनिटभर चांगले मिक्स करून घेतल्यावर त्यात मॅश केलेले फ्लावर आणि बटाटे टाकावे. आणि पुन्हा एकदा मिक्स करून घ्यावे. नंतर त्यात गरजेप्रमाणे पाणी टाकावे.

आता त्यात दोन टेबलस्पून पावभाजी मसाला आणि चवीनुसार मीठ टाकावे. मिक्स करून घेतल्यानंतर त्यावर झाकण ठेवावे. आणि पाच ते सात मिनिट शिजवावे. आपल्याला पाहिजे त्या प्रमाणात भाजी शिजल्यानंतर गॅस बंद करावा. पावभाजी तयार आहे.

आता पाव भाजण्यासाठी गॅसवर एक तवा ठेवावा. त्यावर बटर टाकावे आणि गरजेप्रमाणे पावभाजी मसाला टाकावा. ते छान गरम झाले की त्यावर मध्ये कापून पाव भाजण्यासाठी टाकावे. आवश्यकतेनुसार बटर टाकून दोन्ही बाजूंनी छान भाजून घ्यावे.